Maria College Mavo a tene yen di actividad pa habri aña escolar nobo

ORANJESTAD - Riba 16 di augustus 2019 Maria College MAVO a habri e aña escolar 2019-2020 cu diferente actividad pa su alumnonan. E actividadnan aki ta encera conoce bo mes, conoce bo mentor y bo compañeronan di klas den un forma activo y recreativo. 

CB1: Na Stadion Guillermo Prospero Trinidad a tuma luga un dia yena cu actividad pa nos alumnonan di CB1. Durante e dianan a haya oportunidad, pa conoce nan mentor y otro compañero di klas miho, mediante diferente actividad di 'teambuilding'. Tur esaki pa yuda nan tin un bon comienso na nan scol nobo, cu ta un etapa nobo den nan estudio.

CB2: E alumnonan di CB2 a dal un keiro den nos Parke Nacional Arikok pa cuminsa e aña escolar nobo memey di naturalesa. Hunto cu nan mentor y otro compañero di klas nan a bishita Miralamar y tambe Cas di Torto pa tende poco mas di historia di Aruba. Masha danki na tur e rangernan di Parke Arikok pa a ricibi nos scol.

CA1:  Ciclo Avansa 1 a cuminsa cu un tremendo start pa e aña escolar. Diahuebs 15 di augustus tabata dia di informacion y motivacion. Un danki di curason na Biblioteca Nacional Aruba & Bellance. Diabierna 16 di augustus tur 7 grupo a bay bishita nos districto cultural, San Nicolas y a disfruta di un pelicula na e cinema nobo.