Gobierno di Corsou a ofrece 608 ambtenaar un areglo di retiro boluntario

Gobierno di Corsou a ofrece 608 ambtenaar un areglo di retiro boluntario

Posted on 08/21/2019 9:37 am AST | Updated on 08/21/2019 9:38 am AST

WILLEMSTAD - Un grupo di empleado publico di Corsou, cu kier baha cu retiro boluntario prome cu e edad di pensioen di 65 aña, recientemente a haya mas informacion tocante e areglo boluntario. Ta trata di un grupo di 608 ambtenaar cu a nace entre 1di januari 1957 y 31 december 1960, cu por scoge pa sali for di servicio pa mas tarda 31 di december 2020.

Luna pasa Minister, Armin Konket di Gobernacion, Planificacion y Servicio Publico, a splica e motibonan pa yega na e oferta. Ta trata di un grupo di ambtenaar, cu mester a baha cu pensioen algun aña pasa caba, pero pa motibo di cambio di ley di pensioen te ainda nan ta den servicio. Segun Konket hopi di nan a bisa cu no tin gana di traha mas. Konket a splica cu ‘den cuadro di halsa productividad di trabou pa e grupo specifico, nos a traha un pakete pa wak con nos por deal cu e buraco financiero, cu nan tin si nan stop di traha.’

Awor ta conoci cu gobierno lo compensa entrada di tur persona cu scoge pa tuma e areglo aki door di:

1. Duna un pago mensual ekivalente na e montante di AOV ta 65 aña.

2. Duna un compensacion mensual na rason di e prima di AOV/AWW, cu e ambtenaar ta paga te 65 aña.

3. Duna un compensacion mensual na rason di e prima di BVZ cu e ambtenaar ta paga te 65 aña.

4. Duna un biaha un suma pa compensa e posibel perdida di 6% di pensioen cu bo no ta acuma anual mas door di baha prome cu edad di 65 aña. Lo determina e suma pa medio di un “gliding scale”:

-1960 (60 aña te 61 aña) 60.000 Naf

-1959 (61 aña te 62 aña) 55.000 Naf

-1958 (62 aña te 63 aña) 50.000 Naf

-1957 (63 aña te 64 aña) 45.000 Naf

Ministerio ta splica cu e suma ta determina a base di 30 aña di servicio. Tambe ta bisa e ambtenaarnan, pa tene cuenta cu mester retene impuesto.

Presidente di sindicato ABVO, Adrie Williams, luna pasa a conseha tur ambtenaar cu a haya un oferta for di gobierno, pa un retiro boluntario ‘pa no firma, sin consulta cu bo sindicato’. E sindicatonan ABVO, STrAF, NAPB y SAP ta investiga e oferta, prome cu nan conseha nan miembronan deliberadamente. Cortesia Extra. 

 

 

  • Powered by SETAR