Sindicato STA a entrega e Concepto pa e CAO na gerencia di AAA NV

ORANJESTAD - Directiva di sindicato STA despues di a reuni dia 15 di augustus ultimo cu su miembronan emplea na e compania; AAA NV, a haya e mandato unanime di su miembronan, pa presenta e concepto nobo pa e CAO 2020-2023, cu mester bay negocia den e lunanan venidero. Riba 19 di augustus 2019 a entrega e concepto nobo conforme e stipulacionnan den nos contrato colectivo vigente. Mester bisa cu e participacion den e concepto aki tabata uno hopi habri y democratico, caminda a tene cuenta cu tur e peticionnan, cu a bin di parti di nan miembronan, cu a asisti na e reunion.

Sindicato STA ta e sindicato cu a negocia e prome CAO pa e compania; AAA NV na aña 1996, den cual a pone e base, fundeshi, pa un CAO hopi bon balansa y hopi lucrativo pa e empleadonan di AAA NV.

Na aña 2001 un otro sindicato a drenta y a desbarata e CAO aki y despues cu e sindicato STA cu sosten di e empleadonan a core cu nan STA a drenta bek, pa drecha e daño haci y a tuma e sindicato basta tempo, pa drecha tur e dañonan ocasiona pa e otro sindicato.

Desde aña 2004 te cu awe ta sindicato STA a negocia e contrato colectivonan pa e empleadonan di AAA NV, cu semper a conoce adelanto durante e ultimo 15 añanan. 

E directiva nobo di STA actual a sa di hiba e empleadonan den tur sector di e compania dilanti y lo continua haciendo esaki den e contrato colectivo nobo tambe, cual concepto ta uno hopi eleva y bon balansa. Compara cu e esun actual lo ta un adelanto atrobe pa tur departamento di e compania en cuestion.

A pesar di algun turbulencia cu tin actualmente den e compania, pa motibo cu un otro sindicato a solicita un referendum directiva di STA, a bin compronde for di e propio empleadonan cu un grupito kier purba kibra tur locual cu nos tin awor aki den nos CAO y esaki sindicato STA ta condena totalmente y pa e motibo aki tambe ta haciendo un solicitud na su miembro- y empleadonan, pa no bay vota den un posibel referendum y si nan bay vota mes vota blanco, paso tin hopi empleado cu a haya intimidacion y a engaña nan y esaki no ta democracia, sino dictadura.

Finalmente STA a bin ta ricibiendo den e ultimo dianan un cantidad grandi di persona, cu a hala atras nan sosten di e sindicato cu a solicta e referendum. Mas di 25 empleado caba a distancia nan mes for di e desaster cu lo por spera nan y den transcurso di e dianan cu ta sigui, mas lo hala atras nan sosten.

Actualmente STA tin representacion di por lo menos1 delegado den cada departamento di e compania AAA NV, pa asina por tene su miembronan bon informa di tur locual ta pasando.