Wever: RdA no a haya carta di retiro di Richard Arends pa su funcion

ORANJESTAD – “Refineria di Aruba (RdA) nunca no a haya carta di retiro di parlamentario Richard Arends, pa su funcion di director financiero”, asina Minister Presidente, Evelyn Wever Croes, a bisa NoticiaCla.com diamars merdia. Parlamentario Richard Arends (AVP) mester proba, cu enberdad el a retira RdA, pa e limpia su nomber segun e prome mandatario. Sinembargo Arends ta sigura NoticiaCla.com cu el a entrega RdA e carta, pero no a produci e carta pa e portal aki ainda. 

E CASO

Henter e asunto a cuminsa ayera segun Wever a bisa Noticiacla.com. “ Ayera Parlamentario Edgard Vrolijk a presenta un contrato laboral cu sr. Richard Arends a wordo nombra como director financiero di RdA. Esey a sorprende mi, pasobra mi ta corda cu un tempo pasa, a trece esaki  dilanti, pero sr. Arends a nenga esey caregoricamente” Wever a cuminsa bisa. “Awor sr. Arends a admiti cu el a firma e contract, pero cu nunca el a cobra; pues ya el a cuminsa cambia su storia”. 

RETIRO

Segun Wever, awor Arends ta bisa cu el a entrega su retiro. “Si ta asina mi ta pidie, pa e mustra nos su carta di retiro. Pasobra ami no por haya su carta di retiro y director di RdA tampoco a haya su carta di retiro. E director di RdA a informa mi, cu e no tabata sa di e contracto laboral tampoco,” Wever a sigui bisa. Pues segun Wever, awor ta sr. Richard Arends mester bin padilanti y mustra cu locual cu parlamentario Edgard Vrolijk a trece padilanti, no ta corecto. 

PRESION

Wever a bisa cu mientras cu e ta sugeri pa Arends retira, e (Wever) no por haci esey. “Ami no por pone presion riba dje pa haci loke ta corecto, esey ta algo cu e mes of Parlamento mester haci. E por dicidi di keda sin bin cu e prueba, y pasa pa historia como un otro politico di AVP haragan y literalmente sin ningun berguensa, pero conociendo sr. Arends, mi ta duda cu e lo laga esey pasa” Wever a sigui bisa. Segun Wever, lastimamente sr. Richard Arends no ta apareciendo den Parlamento. “Ami tin dos dia den Parlamento caba y e no ta biniendo trabou. Ta via Facebook e ta comunica, cual ta di lamenta”.  

PRESENTA PRUEBA

“P’esey mi ta urgi sr. Arends pa presenta su prueba. Sapatia, tira lodo riba otro hende, no ta coregi bo eror. Haci loke ta corecto so, por coregi bo eror. Tuma e ehempel di nos colega parlamentario SueAnn Ras, cu pa algo hopi menos serio, a tuma su retiro. Loke sr. Richard Arends a haci ta algo hopi serio. Exigi salario y condicion di trabou asina exorbitante for di e companianan estatal, ta un eror, un abuso grandi. Sigur sabiendo cu gobierno y pueblo tin mester di e placa ey. Sr. Arends a admiti cu el a comete e abuso ey, cu su firma riba e contract. Awor e mester haci loke ta corecto. Admiti bo eror, tuma bo retiro,” Wever a finalisa bisando e portal aki.