Diadomingo a tene e di di tres edicion di ‘Honor to Connor Steelband Celebration’

Posted on 08/20/2019 11:55 am AST | Updated on 08/20/2019 11:56 am AST

ORANJESTAD – E celebracion aki tabata un anochi di homenahe na e Legendario Sr. Edgar Connor (d.f.m.) cu ta pionero, legendario den musica Steelpan fundador di e famoso ‘Aruba Invaders Steel Orchestra’. E conocido Melvin Garcia a fungi como animado y Maestro di Ceremonia. E studiantenan di ‘Aruba Panman Foundation’ bou direccion di Angel Hazel y Lee Connor, a habri e anochi musical cu e ‘stage fear’ domina, unda nan a haci nan presentacion y laga e publico disfruta di nan entusiasmo, cu nan tin pa nan instrumento di steelpans. A sigui Touch of Steel, Nico Connor acompaña pa Ivan Quandus y Michael Odor hunto cu ‘NLG Dancers’. E anochi a continua cu presentacion di ‘Quiver Quips Steel Orchestra’ y na final ‘The Aruba Invaders’ bou direccion di e rumannan Nico y Lee Connor, acompaña pa ‘Carnaruba’ cu nan trahenan mahestouso di Carnaval. 

Durante e anochi a duna reconocimento na cuater persona, cu a contribui na e mundo di Steelpan aki na Aruba: Sr. Tico Kock, fundado y integrante di ‘Touch of Steel’ cu na 2020 lo cumpli 30 aña, Sr. Michael Odor, Sr.Ivan Quandus cu tin hopi aña ta traha conhuntamente cu Nico den studio y tambe riba escenario nan ta forma parti di mayoria di Nico su produccionnan. Y por ultimo Sr. Francis Ridderstap ‘Leisure Manager’ di Tamarijn y Divi Aruba All Inclusive Resorts, cu a habri porta pa hopi musico pa presenta na hotel como tambe e rumanan Connor y particularmente Nico Connor cu a cuminsa toca na Tamarijn y Divi for di 1994. Francis semper ta dedica na su asociadonan, cu ta traha cu ne y sa pa duna nan compliment. Semper ta curasha su hendenan, pa nan keda bay dilanti den bida. Tabata un anochi sublime, un anochi mahestral, unda e publico a yega na gran cantidad, na e amfiitheatro Edgar Connor, na Paseo Herencia completamente yen cu nos hendenan local y e turistanan. E publico en general a sa di disfruta di e di tres edicion di ‘Honor to Connor Steelband Celebration’ den forma grandi.

 

  • Powered by SETAR