World Series Little League 2019:Corsou tin tres picher cla pa Venezuela

WILLIAMSPORT.- Corsou a gana convincemente di Canada den e campeonato mundial di Little League y awor ta preparando pa subi tereno awe tardi 3 or contra Venezuela cu a logra victoria preta di 8-7 riba Mexico.

Manager Michelangelo “Lo“ Celestina a duna di conoce na Mundu Deportivo cu Corsou tin tres picher cla cu por subi monticulo contra e Venezolanonan, entre otro; Jurdrick Profar y Curley Martha. Manager Celestina a bisa cu mester papia den cuerpo tecnico, pa por uza e pichernan den un forma corecto, mirando cu ta tur partido cu ta bay sigui aworaki, Corsou mester gana, si nos kier yega final diadomingo awor.

Kisas hasta por warda Profar pa diaranson, mirando cu ganando Venezuela awe, nos tin hopi chens di por bolbe topa Sur Korea pa Corsou por pasa pa e final internacional diasabra awor. E ta bay bira un partido hopi fuerte awe y no tin duda cu nos muchanan ta bon prepara tanto mentalmente como fisicamente pa por enfrenta Venezuela.

Despues di e partido di ayera e mayornan por a topa cu e muchanan y papia cu nan y asina socialisa un rato. Esaki ta tuma luga despues di cada partido.

Di acuerdo cu manager Celestina; “nos ekipo a bati bon ayera den “clutch” contra Canada y si nos sigui mishi cu e bala oportuno, nos por por sali dje porta grandi. Un factor cu nos tin cu tene cuenta cu ne ta nos banki, cu ta hopi importante den e tipo di serienan cortico asina aki. Na momento cu bo drenta wega, no tin tempo pa climatisa, ta drenta mester drenta y haci e trabou.

Mester elogia e cantidad di yiunan di Corsou, cu a biaha cu e seleccion di cual mayoria ta e mayornan, cu ta un sosten enorme pa e muchanan. Hunto cu nan tin D.A. di Corsou, Little League Urny Floran, Lando Chirino como un dirigente di Little League y tambe nos a tuma nota di Vernon “Triple A ‘’ Isabella, cu ta duna e sosten entre otro, na Lo Celestina, cu por cierto tabata hunto como parti dje cuerpo tecnico, cu na aña 2004 a titula Campeon Mundial di Little League.

Cortesia Extra