Arends: Mi no por claim un derecho na un funcion cu nunca mi a eherce

ORANJESTAD – Despues cu Prome Minister di Aruba, Evelyn Wever, a lansa e puntonan riba su pagina di Facebook pa e asunto di contracto lucrativo pa actual parlamentario Richard Arends, e parlamentario a reacciona pa noticiacla.com. “M’a tuma nota di e post di Prome Minister riba su pagina di Facebook. E informacion cu e ta trece dilanti no ta completo” Arends ta cuminsa na bisa. “Mi persona a wordo acerca pa asumi e cargo di director financiero na RdA na oktober 2016, pero prome cu mi a logra eherce e funcion aki, mi a wordo acerca pa asumi cargo di minister na december di mesun aña,” Arends ta sigui bisa. “M’a notifica e accionista cu lo mi no asumi e funcion ofreci. Y pa coregi señora Prome Minister: mi no por claim un derecho mara na un funcion, di cual nunca mi a eherce,” Arends ta continua bisando.  E ta admiti cu el a firma e contracto berdad, pero nunca no a eherce e funcion. Esey segun Arends, tabata prome cu a pidie pa bira minister. Despues el a distancia su mes di tur interes comercial, segun Arends a indica na e portal aki. 

ARENDS RIBA INTEGRIDAD 

Riba e tema di integridad, tambe Arends a reaciona. “Pa loke ta e tema di integridad, mi ta totalmente di acuerdo cu señora Prome Minister! Integridad mester conta tambe ora cu e familiarnan directo ta representa e interesnan di e empresanan estatal, cu ta resorta bou su mesun ministerio” Arends a sigui bisa.

MIYON

E argumento cu mester paga Arends 2.6 miyon florin pa kibra e contract, segun Arends ta un calculacion cu nan (MEP) lo mester a haci. Pero segun Arends, dos siman despues di a firma e contracto, el a retira di e funcion. Pues nunca no a eherce e funcion, pasobra el a bira minister despues.