Prome Minister Wever ta kere cu parlamentario Arends mester retira

ORANJESTAD – Un documento cu a aparece aworaki ilustrando e hecho cu un actual parlamentario lo a haya un funcion halto na Refineria di Aruba (RDA), a crea comocion dialuna den mundo politico na Aruba, te na e punto cu prome minister ta ‘sugeri’ retiro di un parlamentario di AVP. “Ta resulta awor cu a nombra Richard Arends como director financiero di RdA na aña 2016. Te awe e ta nombra. Y pa kit’e di trabou mester pag’e 2.6 miyon florin!” Prome Minister Evelyn Wever a post riba su pagina di Facebook. “Integridad! Mi ta mas determina cu nunca, pa bin cu e institutonan”. Arends mientrastanto a admiti na NoticiaCla.com cu enberdad RDA a ofrec’e e funcion, pero nunca el a tum’e, ya cu a pidie y el a scoge e ora pa bira Minister di Economia pa gabinete Mike Eman II. 

E COMOCION

Dialuna e documentonan a wak luz di dia y ta mustra cu a ofrece actual parlamentario pa partido AVP, Richard Arends, e funcion di director financiero di RDA pa e suma mensual di riba 22 mil florin. Loke ta hala atencion ta, cu segun e post di Wever, Arends lo ta nombra ‘ainda’, siendo cu el a fungi como minister y awor ta parlamentario. Pues cu el a sconde e posicion ey tur e tempo. Algun ora despues, Wever a ‘actualisa’ su post cu mas informacion. “Mientras nos ta investigando con e informacion aki por a keda scondi pa Gobierno tanto tempo y considerando e desaroyonan tocante integridad, mi ta kere cu sr. Richard Arends mester entrega su retiro” Wever a bisa. “ Esaki ta un ehempel di “fix” bo propio posicion cu un salario gordo gordo sin cu ningun hende por kita bo! Esaki ta abuso tipico di AVP. Mi ta hopi indigna y decepciona. Pendiente di e investigacion! ” Wever a sigui bisa. Hunto cu e post, tin e contracto cu Arends a firma y parafeer na 2016.