Si cos no cambia, varios negoshi na San Nicolas lo cera fin di aña

SAN NICOLAS – “Si e situacion no cambia na San Nicolas dentro di e proximo 6 luna, varios negoshi ta cera nan porta fin di aña”, asina presidente di San Nicolas Business Association Andres Hernandez a bisa NoticiaCla.com dialuna durante un conferencia di prensa. E cantidad ta entre 5 pa 6 negoshi cu ta bringando pa keda habri. E cumbre comercial cu ta tuma lugar e siman aki (diaranson ) na San Nicolas, tin cu trece e cambionan necesario cu mester por evita e scenario menciona. E cumbre diaranson ta trece por lo menos 25 orador, entre nan e inversionistanan local y internacional, cu lo presenta nan intencion (si tin). 

SITUACION NA SAN NICOLAS

Entre e situacion presenta, Hernandez a bisa cu p.e. pa ora, tin 3 hende ta cana den centro comercial. Y esey sigur no ta nada bon. Cos no ta bon y pa e drecha, mester movicion, pa asina genera trafico. Trafico cu mester genera benta pa asina, e negoshinan cu ta den cera porta, por lo menos por haya un miho perspectiva pa e siguiente 6 luna. E cumbra diaranson no ta un garantia cu cos lo drecha, pero sigur ta un bon iniciativa segun SNBA, cu por percura pa ‘trigger’ accion positivo necesario. E cumbre ta cuminsa 9or di mainta y ta caba diaranson merdia. Lo converti Santa Teresita Center den un tipo di centro profesional, nunca bisto cu lo mester crea un ambiente atractivo comercial pa esunnan presente. Loke ta yena SNBA cu orguyo, ta e hecho cu gobernador di Aruba, Su Excelencia Alfonso Boekhoudt, no solamente lo ta presente, pero lo hiba palabra tambe durante e evento.