Prome “kijkoperatie” di pulmon a tuma luga na Aruba

ORANJESTAD - Pa prome biaha na Aruba a tuma luga recientemente un operacion special di pulmon pa medio di un “kijkoperatie”. Un momento grandi den mundo medico na Aruba segun directiva di hospital di Aruba, unda un specialista di Hulanda a bin Aruba, specialmente pa haci esaki.

E ciruhano specialisa dr. Van den Broek compaña pa nos ciruhano local dr. Casseres a haci 3 operacion durante su estadia na Aruba cu hasta na Hulanda ta basta ‘unico’ y no ta sosode hopi. 

“Normal ta habri e thorax, pa asina por ehecuta e operacion, pero awo via 4 corta chikito por bay cu un camara paden di e curpa y den e caso aki, kita un pida di e pulmon”, asina Dr. Yuri Casseres, Ciruhano General na hospital, a duna di conoce. E di dos operacion tabata di un pashent cu tabatin un tumor net tras di su weso na e pecho; normalmente tambe mester habri pida grandi di e pecho pa sak’e. Awor via e ‘kijkoperatie’ por a haci esaki via corta chikito y saca e tumor.

Probechando bishita di e specialista, a opera un otro pashent cu un tumor basta grandi na pulmon, cu tabata pega na su ribchinan. E operacion ta uno grandi y normalmente lo a manda e pashent afo, pero e dokter aki tabata na Aruba y tin experiencia den esaki. Pues a logra opera e pashent sin complicacion. E 3 tipo di operacionnan aki nunca por a haci via e metodo aki na Aruba prome y dr. Casseres ta orguyoso y hopi agradecido cu tur cos a bay bon cu e pashentnan.

“Pa nos mes e ta un conocemento mas, pues un experiencia mas”, dr. Y. Casseres a duna di conoce. Pa por haci esaki mester tin basta experiencia y esaki ta algo nobo pa Aruba. Asina tambe e dokternan local por siña di e tipo di operacionnan aki di e dokternan di afo. E cooperacion cu e dokter di afo a bay asina bon, cu na luga di manda pashent afo, ta planeando cu den futuro e dokter por bin mas biaha pa asina por opera aki mes. 

Esaki lo baha e gasto hopi, ya cu no mester manda pashent afo, por ehempel pa Colombia, unda nan ta compaña pa famia, cu lo mester keda un par di siman. Pa trece dokter Aruba ta sali mucho menos y ademas, e recuperacion ta hopi mas lihe door di e corta chikito y e pashent ta mas trankil y comodo riba su isla den su propio cas, unda e sernan keri por asisti den e rehabilitacion.

E cooperacion entre Aruba y Hulanda pa dr. Frank van den Broek, ciruhano di pulmon y ciruhano oncologo di Maxima Medisch Centrum a bay hopi bon. Esaki ta su di 4 biaha di bishita na Aruba. No solamente el a core stage durante su estudio na nos Hospital, pero tambe el a haci un parti di su estudio na Aruba, pues e tin experiencia caba cu nos isla y conoce algun di nos specialistanan cu e tin contact cu nan regularmente. Asina a mantene e contactnan y awo cu tabatin algun caso cu tabata rekeri cierto experiencia extraordinario, a opta mesora pa bin reenforsa. 

Dr. van den Broek a duna di conoce cu e setting na Aruba tabata mescos cu na Hulanda; un bon team di enfermero y otro colega na sala di operacion y e hermentnan necesario pa opera. Na e manera aki por traha den bon “teamwork” y por logra hopi.

E ‘kijkoperatie’ aki ta un logro grandi cu nos por ta hopi orguyoso di dje.