Evento musical pa un dia pa colecta fondo pa yuda salud di musico Hildward Croes

ORANJESTAD – Un evento unico na Aruba, uniendo como 16 banda completamente gratuito pa un dia, tin e meta pa recauda fondo pa yuda conocido musico arubano Hildward Croes busca su salud den exterior mas pronto cu ta posibel. Su prima y miembro di e comision cu a lanta pa organisa e evento “A Chant for hope”, esta Guissette Croes a repasa e situacion di salud di Hildward y e necesidad urgente pa haya e fondonan. Segun Croes, e cancer cu a detecta serca Hildward aña pasa, a bolbe y mester haya forma pa bolbe remove esaki di su curpa. Diferencia di opinion medico ta pone cu AZV no ta cubri e gastonan pa cual mester a busca alternativa pa cu esaki. AZV a yuda Hilduard semper unda cu por, pero den e caso aki, mester coi otro caminda segun Croes.

Segun Croes a conta, recientemente despues di a haya un dolor enorme den su lomba, a keda constata cu aña pasa no a logra elimina e cancer por completo. E cancer a keda activo den su curpa. Despues di a manda tur informacion pa un colegio di specialista na Colombia a keda diagnostica cu Hildward mester viaha IMEDIATAMENTE unda cu tin un Organo di Specialista ta wardando riba dje. Pa e operacion ta exitoso, no ta aconsehabel pa Hildward tuma Chemo pa motibo cu esaki lo debilita su curpa di tal manera cu ta hasi un operacion cu awor ta prioridad, imposibel.

Pa e motibo aki su amigo, famia y coleganan, a bin cu e idea pa haci un recaudacion di fondo nacional pa Hildward. Meta ta pa 1. E por bay Colombia hasi e operacion aki di su lomba cu awor ta esun cardinal cu tin tur prioridad, pa despues Hildward bay Merca en busca di un sanacion total di e Cancer.

En vista cu musica semper a forma parti integral y fundamental di Hildward su existencia, di Hildward su bida, a disidi pa atravez di un magno evento musical cu cooperacion di tur bandanan local, crea e ambiente alegre y positivo pa duna tur hende oportunidad e dia aki di por hasi nan donacion.

Evento a haya e nomber: A Chant for Hope. Canto pa Speransa. Fecha ta 30 di November cuminsando for di 3pm te cu 11pm. Venue ta Renaissance Market Place kendenan nos ta gradici cu henter nos curazon pa imediatamente a pone Renaissance Market Place disponibel pa e evento aki cu ta priminti di bira e Manifestacion Musical di mas grandi den historia di Aruba cu participacion di tur banda musical como tambe diferente interpretenan como solistanan riba un solo dia, cu un solo causa.

Di nos parti nos ta gradici tur musico cu mesora a pone nan disponibilidad pa haci e recaudacion di fondo aki uno MAGNO. Nos ta gradici tur nos medionan di comunicacion aki na Aruba cu mesora a duna nan cooperacion pa carga promocion di e gran evento aki. Na Stichting Care for Friends cu a pone nan fundacion na nos disposicion pa recaudacion di fondo:

STICHTING CARE FOR FRIENDS

AVENIDA DON MILIO CROES 60

CMB 62329300

Swift: CMBAAWAX

LAST BUT NOT LEAST: Na Dios Tata Todopoderoso pa su guia y pa e amor di tur hende pa Hildward.

 Ta invita henter Pueblo di Aruba pa pasa 30 di November na Renaissance Market Place. Entrada ta completamente gratis. Musica di tur nos bandanan y artistanan local lo resona riba dos escenario for di 3pm te cu 11pm. E dia aki pa un solo presentacion Grupo di Betico lo rindi homenahe na Hildward. Lo tin muchanan di Padvinderij uniforma canando rond cu bins pa recolecta placa. Dilanti escenario tambe lo tin bins grandi unda tur hende por hasi nan donacion.

Por ultimo nos ta clausura cu un mensahe cu ayera Hildward a pone riba facebook:

“Querido amigonan.Na prome luga mi kier gradici cada un di boso profundamente pa e bon deseo, oracionnan, y sosten grandi cu mi ta ricibiendo na e momentonan poco dificil aki. Mi fe ta sigui absolutamente intacto y mi ta convenci cu na final di dia nos bon Tata Dios lo percura pa tur cos sali bon segun Su plan perfecto. Mi ta ricibi mi sanacion cu tur humildad den Su nomber. Tin biaha, e cosnan menos bon cu pasa cu nos den nos bida ta pa pone nos directamente ariba e caminda pa e mihor cosnan cu lo bay pasa cu nos. Mi ta realisa berdaderamente con Bendiciona mi ta di ta biba ariba e dushi isla aki y di por ricibi e yobida di sosten y apoyo cu mi ta ricibiendo. Di curason, danki. Dios bendiciona boso cada un ricamente y cu tur e bon deseonan por retorna serca boso redobla. Abrazos! Hildward”