Na Corsou, homber a corta pareha cu nabaha pa despues accidenta cu vehiculo

WILLEMSTAD.- Un dama ta den hospital interna cu situacion hopi delicado, despues cu e lo mester a keda corta pa su pareha cu un nabaha. Diadomingo alrededor di mitar di dos di marduga, Central di Polis a dirigi un unidad policial na Kaya Malwa na Kustbatterij, pa un caso di maltrato serio. Na yegada di e unidad, a topa un dama cu un herida serio na altura di su garganta y cu tabata sangra bastante. Mesora a pidi presencia di ambulance na e sitio cu a transporta e dama D.M. naci na Corsou di 33 aña di edad pa policlinica di SEHOS pa tratamento medico.

Den cercania polis a topa cu e sospechoso, e homber R.R. naci na Corsou di 31 aña di edad.  E homber aki tabata sinta den un auto, cu a accidenta contra di un cura di un cas. E tabatin su pia y man fractura, motibo pa cua e tambe mester a keda transporta cu ambulance pa policlinica.

For di un investigacion cu polis a realisa na e sitio, a sali na cla cu e pareha aki tabata hunto na cas y pa un motibo te ainda desconoci, e homber R. lo a corta su partner M. cu un nabaha.

Despues di su acto, e sospechoso R. a drenta un auto, core cu velocidad halto y bay accidenta contra di un cura di un cas eybanda. Ambos victima a keda interna den hospital y asina cu e posibilidad presenta, lo detene e homber sospechoso R.R. pa mas investigacion. Cortesia Extra