Corte a kita beslag miyonario riba remolcador Maridive 702

ORANJESTAD – Corte diaranson a kita e beslag imponi riba e bapor (remolcador) Maridive 702 cu bandera Panameño, indicando e.o. cu e beslag tabata poni inhustamente y riba e propiedad robes. Tabata luna pasa, manera cu Noticiacla.com a raporta, cu e compania Riverlake Solutions a laga pone beslag riba e bapor, pa e suma di 21 miyon di dollar pa e motibonan cu segun e compania Riverlake Solutions, tabata necesario. E compania doño Maridive Mexico sinembargo, pa medio di su abogado local, Lincoln (Dello) Gomez, mesora a bringa esaki y a logra diaranson pa laga corte di Aruba revoca e beslag. Mester bisa si cu e bapor a bandona Aruba basta dia pasa caba.  

E CASO

E informacion inicial di parti di esunnan cu a pone beslag, tabata cu ora cu na juli corte a impone e beslag, riba 14 di juli ultimo, e remolcador a opta pa bandona Aruba toch, pagando e aparato cu cual por detecta su movimento. E partido cu a laga pone e beslag e tempo ey, a mustra cu esey tabata algo ilegal, pa cual e capitan por hay’e den problema legal serio, incluyendo detencion y encarcelacion. A entama un caso pa bringa e beslag, alegando entre otro riba e confusion pa cu e propiedad y su doño y tambe e tipo di trabou cu e remolcador ta y mester ta haciendo. Ademas a mustra cu e demanda miyonario en realidad ni tabata existi. Durante e tratamento den corte sinembargo, e doño di e remolcador a desmenti categoricamente cu a paga e aparato intencionalmente y a mustra cu e aparato simplemente (hunto cu otro aparato) tabata daña. Ademas e beslag, segun abogado Gomez, ta poni di un forma ilegal. Na tur, ta mustra cu tabatin un manipulacion formal y informacion door di esunnan cu kier a pone beslag. Cu e sentencia aki a keda demostra cu e demandantenan no tabatin base legal pa pone beslag ariba e barco. A compronde cu e partidonan anteriormente tabata den un proceso di arbitrahe na London. Wak e sentencia AKI.