Bikker: Kier introduci castigo mas severo pa preso cu purba scapa for di prison

ORANJESTAD – “Gobierno lo introduci castigo mas severo den caso cu un preso purba scapa for di prison”, asina Minister di Husticia, Andin Bikker, a anuncia diahuebs mainta pa medio di un comunicado. Esaki ta bin den cuadro di e huida ultimo di diaranson anochi di dos hoben for di prison KIA. Segun e comunicado, ministerio di husticia, bou guia di mr. Andin Bikker, conhuntamente cu DWJZ y otro departamento concerni, ta trahando riba e proposicionnan di ley, caminda cu lo bay update diferente ley, cu ta regarda Husticia, Siguridad y Integracion.

AUMENTA CASTIGO

Entre otro e minister ta evaluando pa aumenta e castigo pa esunnan cu ta brinda ayudo na e prisoneronan pa purba scapa for di prison. Articulo 2:146 di Codigo Penal ta stipula: ‘Hij die opzettelijk iemand, op openbaar gezag of krachtens rechterlijke uitspraak of beschikking van de vrijheid beroofd, bevrijdt of bij zijn zelfbevrijding behulpzaam is, wordt gestraft met gevangenisstraf van ten hoogste vier jaren of geldboete van de vierde categorie.’. Ta evaluando pa aumenta e castigo capta den e articulo menciona di 4 pa 6 aña y asina subraya e seriedad di e crimen.

SINTA CASTIGO COMPLETO

Ademas, adicional na e hecho cu un preso concerni lo mester sinta e castigo impone den su totalidad y por haya castigo adicional y disciplinario, ta evaluando pa introduci mas tipo di castigo severo pa esunnan cu purba scapa di prison, similar manera ta existi na entre otro Merca, Canada, Francia y diferente otro pais rond mundo.

SOFTWARE

Minister Bikker semper ta subraya cu e leynan ta e ‘software’ di un pais, pues mester adapta e leynan constantemente, pa por tin e instrumentonan huridico efectivo y moderno, pa por adresa e retonan cu nos pais ta enfrenta.