Wever: Campaña nacional di integridad di Oficina di Integridad ta cuminsa

ORANJESTAD - “Awe ta cuminsa Campaña nacional di integridad di Bureau Integriteit Aruba”, asina Prome Minister, Evelyn Wever, a anuncia durante conferencia di prensa diahuebs mainta. Manera ta conoci, dia 1 di october 2018 a institui e comision, cu meta pa aumenta conscientisacion tocante kico por y no por riba e tema di integridad. E mandatario a mustra cu e oficina aki lo tuma e meldingnan tocante kiebro di integridad. E departamento aki no ta cla ainda pa tuma yamada y mester ta completamente ekipa cu personal pa hacie y a sigura cu ta personal di gobierno mes lo tuma, pues niun hende nobo lo maneha esaki. E mandatario a mustra cu mester tin tur personal disponibel, paso tur yamada cu drenta mester haya un follow up inmediatamente, sino e proposito ta cay na awa. “Sinembargo ta cuminsa cu un campaña di aumento conscientisacion y prevencion tocante kico ta integro of no” e mandatario a bisa. E campaña ta bou di auspicio di Bureau Integriteit Aruba y kwartiermaker Amelin Flanegin. E intencion ta pa enfoca riba hecho cu BIA su so no por logra integridad, paso semper tin dos hende envolvi den un hecho asina. P’esey e enfasis ta cu hunto nos por logra integridad.