Hoevertsz y Eman cu prome medaya pa Aruba den e Weganan CAC na Mexico

VERACRUZ  -E tabata un cuestion di tempo pero awor e ta un realidad. E delegacion di Aruba cu ta participando den e Weganan Centro Americano y del Caribe a logra nan prome medaya na Veracruz, Mexico ora cu e atletanan di landamento sincronisa Kyra Hoevertsz y Anouk Eman a gana medaya di brons den e competencia di duet rutina liber. Despues di a logra un di cuater luga den e rutina tecnico tras di Venezuela y asina keda net cortico pa un medaya, e atletanan Hoevertsz y Eman a bin fuerte e diahuebs atardi aki. Den un Centro Acuatico completamente yen e dueto di Aruba a landa como e number dos pero niun momento a laga esaki ta un estorbo pa nan. E atletanan tabata hopi sigur di nan presentacion y na final e huesnan a honra e dueto di Aruba cu un puntuacion di 76.100. Solamente Mexico y Colombia por a logra supera e dueto di Aruba. Ora a anuncia e puntuacion di e dueto di Venezuela cu tabata e rival mas cercano unda esaki a resulta mas abou cu esun di Aruba, e alegria tabata inmenso, cu grito di henter e delegacion a celebra e triunfo historico aki.  Despues di e entrega di medaya e atencion pa e dueto Hoevertsz y Eman tabata grandisimo sigur di prensa internacional pero tambe di e fanaticada den tribuna.