DIP lo entrega keho na O.M. pa posibel soborno y estafa

ORANJESTAD - Minister di Infrastructura, Otmar Oduber, diamars atardi a instrui director di DIrectie Infrastructuur en Planning (DIP), pa no solamente haci un investigacion interno mas profundo na DIP, pero tambe a instrui e director di DIP, pa entrega un keho formal na Ministerio Publico pa posibel soborno y/of estafa den cual un of otro persona, cu ya ta menciona pa algun tempo, lo por ta envolvi. Asina e mandatario a informa diaranson mainta den un conferencia di prensa. Tin algun persona cu a denuncia otro, di ta liga na e ministerio di infrastructura y cu e cosnan irregular lo ta pasando. E mandatario a sigura cu esaki no ta e caso. Banda di esaki a prohibi entrada di dicho personanan, na e edificionan di DIP, te ora cu e investigacion termina.

E ministerio di infrastructura a bolbe enfatisa cu ningun di e personanan envolvi den e acusacionnan aki ta traha pa gobierno y no tin ningun vinculo di trabou tampoco cu nan. Por lo tanto Ministerio di infrastructura ta distancia su mes totalmente di dicho acusacion y ta tuma e pasonan necesario pa subraya e integridad di e departamento di DIP.