AMSTERDAM – E noticia di detencion di yiu di 15 aña di alcalde di Amsterdam, Femke Halsema, no tin efecto politico. E yiu a keda deteni luna pasa, pa ta den posicion di un arma falso, despues cu el a drenta un cas flotante (woonboot) hunto cu un amigo y a huy di polis. Polis a gara nan y detene nan. Mayoria di e partidonan politico ta hay’e un asunto priva. Segun e alcalde, su yiu a keda atendi riba e asunto y mester carga e consecuencianan. Mes momento e ta sigura cu e caso lo no bay den ‘olvido’ manera ta specula. Ta cuestiona e hecho cu polis a ‘tapa’ e noticia asina tanto tempo, mientras di otro banda ta cuestiona ken por a ‘lek’ e noticia na e corant Hulandes; Telegraaf. E alcalde a publica un carta cu splicacion di henter e cuestion. Segun su version, e yiu a actua robes, pero ningun momento a comete un atraco of robo, pasobra no a horta nada. A djis drenta un ‘cas flotante’, coy e aparatonan bieu di paga candela y uza esaki. E arma tabata falso, cual tambe ta ilegal pa tin den posicion.
SCHEVENINGEN – Siman pasa diabierna Minister Geoffrey Wever a haci un bishita na The Pier Skyview na Scheveningen, Hulanda, unda e mandatario a reuni cu interesadonan priva cu a expresa nan entusiasmo pa introduci un atraccion similar na Aruba, specificamente den e ciudad di Oranjestad.
DEN HAAG –Minister Plenipotenciario mr. Ady Thijsen y esposa a tene un recepcion pa celebra Dia di Himno y Bandera na Hulanda. Desde 2015 Arubahuis ta tene un recepcion pa invitadonan for di e mundo politico, embahadornan, functionarionan halto di Estado of di ministerionan cu lasonan estrecho cu Aruba. Tambe miembronan prominente for di e comunidad Arubiano na Hulanda y representantenan commercial y di institutonan di enseñansa tanto riba nivel di HBO como Universidad.
AMSTERDAM – E Conseho di Investigacion pa Seguridad Hulandes (OVV) ta investigando un accidente riba un barco crucero di Holland America Line di siman pasa. Riba e barco Nieuw Amsterdam, cu ta nabega bou di e bandera Hulandes, tabatin un accidente unda cu dos tripulante a fayece. Esaki a sosode den cercania di Bahamas, ora cu algo a pasa den camber di motor. Segun informacion, tabatin un explosion. E barco a sali dia 16 di maart ultimo for di Ft Lauderdale pa un crucero di un siman.
DEN HAAG – E corant Hulandes AD a retira e articulo cu e prominente di partido VVD Hans Hoogervorst ta wak su mes como candidato pa prome minister nobo di Hulanda den e proximo gabinete. “Nos ta ofrece nos disculpa pa e conmocion crea’ e corant ta raporta. Aparentemente un persona a presenta sum es como Hoogervorst y e corant a cay pa e trampa. E motibo di cu nan a revoca e noticia, ta pasobra e ex politico a menasa di cuminsa un investigacion forensico pa cu e forma con e noticia a keda publica. E tabata un periodo caba for di bista como politico, y tabata den pasado ex minister di finanza y salud. Segun Hoogervorst, nunca e la papia cu e corant. E corant sinembargo tabata convenci cu esey tabata e caso si. Pero despues a dicidi pa revoca e noticia toch.
DEN HAAG – Ex top ambtenaar Hulandes Richard van Zwol y ex miembro di partido politico SGP Elbert Dijkgraaf ta bay purba forma un gabinete Hulandes nobo di partidonan PVV, VVD, NSC y BBB. Nan ta bay lidera e negosacionan unda cu e 4 partidonan mester por haya otro riba un acuerdo di gobernacion. Lider di partido PVV Geert Wilders ta esun cu a scohe pa e personanan aki. Cu a scohe e dos personanan aki, no ta sin mas. E lider di NSC Pieter Omtzigt ta spera cu e dos partidonan CDA y SGP (Van Zwol y Dijkgraaf su ex miembronan) ta sostene e formacion di e gabinete nobo. Pues e ta un zet strategico haci aworaki. E dos informadornan tin 8 siman pa logra e trabou. Esey kier men cu dentro di dos luna mester por tin un gabinete nobo. E siman aki ta 4 luna pasa cu Hulanda a bay eleccion pa Tweede Kamer. E ultimo formacion a dura 7 luna, pues cu esun aki, por logra keda cla un luna mas tempran.
DEN HAAG – Hulanda ta aumenta su esfuerso pa negosha tratado fiscal cu varios pais, incluyendo islanan Caribense. Secretario di estado Hulandes Van Rij a presenta un plan di negosacion pa 2024, unda cu ta mustra cu Hulanda ta negoshando cu por lo menos 13 pais, riba sea reforma of stipulacion di tratado nobo di impuesto.