WEB CU PAKETE DI MATERIAL EDUCATIVO TOCANTE AWA Y ENERGIA SOSTENI

ORANJESTAD – ‘Nos no ta experto den educacion, pero si nos ta experto den produccion di awa y energia. Cu e pakete educativo ‘E-project’ WEB Aruba ta duna maestronan di scol e material y hermentnan necesario pa educa nos futuro generacion riba tereno di produccion di awa y generacion di energia sostenibel.’ Asina relacionista publico di WEB, Asja Dongen, a informa na momento cu a introduci un pakete di material educativo pa scolnan secundario. E proyecto piloto ta cuadra cu WEB su vision di ‘Un produccion mas berde, mas Limpi y liber di combustibel na aña 2020’. Un total di 7 scol secundario ta participa na e proyecto piloto cual lo tuma luga durante e aña escolar aki.

E pakete educativo ta consisti di un serie di pelicula cortico, manual pa docente, pregunta y tarea practico pa alumno y hermentnan pa haci e tareanan practico. Un parti di e material ta enfoca riba e tecnica di procesa awa di lama pa awa di bebe. E otro parti ta enfoca riba energia sostenibel y e aspectonan envolvi pa uzo di energia sostenibel riba un isla chikito manera Aruba. Docentenan di N(atuurkunde) & T(echniek) y scheikunde di Mon Plaisir College, Colegio San Antonio, Filomena College, John Wesley College, EPB Hato, Colegio Arubano San Nicolas y Colegio Arubano Oranjestad a compromete pa incorpora e pakete educativo den e materianan di scol corespondiente.

WEB a inicia e proyecto na fin di aña 2013. Director di WEB Aruba, Oslin Boekhoudt a splica cu pa WEB, educacion ta un paso logico despues di a enfoca anteriormente riba conscientisacion di alumnonan. Durante añanan 2012 y 2013, WEB a contribui na simposio Green(s)cool y pa medio di charla riba e topiconan di energia di biento y solo. Boekhoudt a indica cu, ‘Awor cu alumnonan ta consciente, WEB Aruba ta bay un paso mas leu, esta di yuda educa hobennan. Ken mas mihor cu docentenan pa haci esaki?’ Pa e motibo ey, WEB a enfoca riba docentenan y ta enforsa nan cu materialnan innovativo y actual. Tambe ta educa docente y alumnonan pa medio di charla y tour den planta. Den futuro kisas por hasta haci demostracion na sitio di proyectonan di WEB.

E pakete educativo ta resultado di un trayecto di compilacion di material, presentacion na gruponan di docente y adaptacion di e material pa yega na e producto final. Durante e proceso a tene diferente encuentro informativo cu docentenan, pero tambe cu representantenan di Bureau Innovatie, IPA y Directie Onderwijs. E reaccion riba e proyecto te awor aki ta hopi positivo.