Trahadonan di Jeugd Gezondheidzorg a protesta

ORANJESTAD – Trahadonan di Jeugd Gezondheidszorg a pone trabou abou diaranson mainta, como protesta pa incumplimento di promesa di gobierno. E palabracion haci, tabata cu pa e fecha di awe, e 20 trahadonan di e departamento specifico di salud aki, lo mester a haya un edificio adecua pa por traha aden, despues di hopi aña di ta trahando den un situacion deplorable. Sinembargo e palabracion no a materialisa cu a pone cu a protesta y despues bay Bestuurskantoor pa entrega un manifiesto na e minister di Salud Dangui Oduber.  E mandatario a sigura cu lo bay check cu doño di edificio pa ki fecha e mudamento di e trahadonan por tuma lugar.

PROTESTA

Tabata diaranson mainta cu e trahadonan di JGZ a dicidi cu ta basta y a pone tur trabou abou. Segun e trahadonan, durante un reunion di 5 di juli, hunto cu sindicato, a haya palabracion cu lo muda pa edificio nobo entrante 14 di augustus, esta prome cu aña escolar. E accion mientrastanto ta implica tambe cu no ta bay atende cu e scolnan pa loke ta vacuna escolar y otro proyectonan programa. A duna e mandatario 2 biaha 24 ora pa resolve e asunto sino ta manda un carta pa e scolnan informando nan di e accion cu ta afecta e programa di vacuna tambe. A mustra cu tin basta vacuna den stock cu mester wordo usa prome cu October, sino nan ta bay perdi. Y ta basta placa esey ta. 

GOBIERNO

E mandatario en cuestion a reacciona bisando cu e ta compronde e frustracion y cu e lo atende cu e asunto. Esey ta encera cu e ta bay check cu e doño di e edificio cu gobierno a scohe pa ubica e trahadonan, y despues duna e trahadonan un fecha concreto di ki dia por muda eyden. E ta kere cu ta mas tarda algun siman cu e mester por keda cla. Di otro banda, a bisa si cu no por ta asina cu trahadonan ta dicidi cua edificio tin cu scohe. E trahadonan tin un gusto pa un edificio particular, mientras cu gobierno a scohe otro edificio. Y segun Oduber, ta prerogativo, como doño di trabou, pa  scohe e edificio, semper y cuando e ta apto pa e operacion.  Potret ta di NoticiaCla.com di e momento cu trahadonan di JGZ a confronta e mandatario di salud pafo di Bestuurskantoor diaranson mainta cu nan preocupacion.