CEO Peter Elbers: KLM contento cu resultado di buelonan pa Aruba

ORANJESTAD – KLM contento cu resultado di buelo pa Aruba. Pieter Elbers, director ehecutivo recien apunta di e aerolinea a informa minister di Transporte di Aruba Otmar Oduber hunto cu Ministro Plenipotenciario Alfonso Boekhoudt esey durante un reunion diahuebs na Hulanda. Segun Elbers, riba un base continuo tin bon comunicacion cu Minister Oduber, unda ta dialoga y evalua riba e desaroyonan di e mercado y di e coneccionnan cu tin, ademas di e cantidad di pasaheronan cu ta bishita Aruba. Tambe el a bisa cu a tuma e capacidad cu KLM kier ofrece den servicio riba base continuo.

‘Nos a mira un aumento fuerte e ultimo aña y mirando e hecho aki mas cu claro ta pensa con pa mehora e servicio cu ta wordo ofreci na e pasahero di Amsterdam pa Aruba,’ Sr. Elders a indica. Na e momentonan aki KLM tin 5 vuelo pa siman y por a nota un crecemento drastico e ultimo añanan riba e ruta di Aruba y Boneiro.