Aruba tin su prome piloto commercial femenino activo na Aruba Airlines

ORANJESTAD – Aruba tin su prome piloto commercial femenino activo y esaki ta algo historico. E no ta e prome femenino cu a haya su licensia comercial pero si e prome cu ta eherce e funcion. Recientemente Marrit  Gorter (44) a completa su entrenamiento na airbus y a optene su licencia commercial como piloto di Directie Luchtvaart Aruba. Cu esaki, Aruba Airlines ta logra emplea e prome piloto femenino commercial na Aruba. Cu esaki tambe, Aruba ta haya un otro persona femenino cu ta logra algo grandi. Nos tin caba e prome prome minister feminino na cabez di Aruba su gobierno (Evelyn Wever Croes), un persona femenino na cabez di Banco Central (Jane Semeleer), y tambe un persona femenino na cabez di e oficina di turismo di Aruba (Ronella TjisAsjoe). 

HISTORIA

Si mira bek riba historia, tabata apenas na 1973 cu Merca a haya su prome piloto femenino commercial cu a keda recluta pa un aeroliña Mericano, den persona di Emily Howell Warner. Segun e APA (Airline Pilot Association) ta apenas 6% di pilotonan commercial (un piloto cu por transporta pasahero contra pago), ta femenino. Ta 46 aña despues cu Aruba tambe ta logra esaki.