Gobierno a purba awor cu ‘limited tendering’ pa maneho di desperdicio

ORANJESTAD – Despues cu den e prome intento, no tabatin interes pa cu e destaho pa e asina yama Solid Waste Treatment Facility (SWTF), gobierno a dicidi cu ta haci un destaho mas chikito cu un grupo di participante cu tabata interesa si den e prome intento. A mustra cu posiblemente tempo tabata un factor y a dicidi di adapta e destaho.  Segun e comunicado di e mandatario, un team extenso di experto local, como tambe internacional renombra ta trahando duro y estrecho cu otro pa percura pa un proceso solido y transparente. Tambe segun e comunicado di gobierno, ta bisa cu a ricibi hopi bon interes pa e proceso di limited tendering. “Di e forma aki, Pais Aruba lo keda informa comunidad di cada paso cu lo inicia pa asina yega na e plan integral y solucion duradero y sostenibel pa nos maneho di desperdicio” e comunicado ta finalisa bisando.

E PROME INTENTO

Despues cu e grupo di compania cu a participa den un destaho publico, no a presenta ningun oferta, gobierno a duna un grupo un ‘second chance’. Den un comunicado, minister di infrastructura, Otmar Oduber a splica cu gobierno e ta ncaminando un proceso bastante largo pa por yega na un maneho di desperdicio duradero na Aruba. Pa yega e meta aki remediacion di dump Parkietenbos y creacion di un ‘sanitary landfill’ (Pues un dump organisa den cual ta tene cuenta cu sepracion di desperdicio y di acuerdo cu normanan di salud internacional) ta sumamente importante. 

E mandatario a admitie tempo ey cu 18 di juli 2019 e RFP pa Solid Waste Treatment Facility (SWTF) a keda sin resultado. Tabatin 16 compania cu a participa den e bid-walk algun luna anterior, pues companianan cu a bin Aruba y a cana e proceso y haci peguntanan necesario pa por entrega nan oferta. Sinembargo, esaki no a resulta den un grupo of compania cu a mustra interes door di entrega un oferta siman pasa. 

Oduber a duna di conoce cu algun siman prome cu e deadline varios grupo a puntra pa mas tempo mirando cu e ta un proyecto compleho di un magnitud hopi grandi tambe pa Aruba y te hasta den region. Diabierna consecuentemente e reuni bek cu e grupo encarga cu e aspecto tecnico di e proyecto SWTF. A tuma e decision pa duna un periodo/tempo adicional di 90 dia na esnan cu tin interes ainda. 

E motibo dicon no a tuma e decision aki mas prome segun Minister Oduber, ta netamente pa e aspecto di tin un proceso di RFP husto y transparente pa tur participante. Pues aworaki a drenta un fase nobo pa cual a dirigi carta (19 di July 2019) na tur e 16 companianan aki cu a participa na e bidwalk, caminda cu Gobierno ta duna te cu 31 di July 2019 pa ricibi notificacion di nan, si tin interes ainda pa entrega un oferta. Si esey ta e caso nan lo ricibi un periodo adicional di 90 dia pa nan por entrega nan oferta. Ta remarca cu e escogencia pa incinerator ta basa riba informacion ricibi di e propio companinan cu a participa den e RFI, considerando cu entre otro no tin suficiente tereno na Aruba pa sigui deposita sushi manera cu ta e caso cu e landfill, e implicacionnan pa salud y daño medio ambiental. E incinerator a cambio, ta kima e masa di sushi reduciendo esaki considerablemente, mientras e ta genera coriente.

Hunto cu esaki ta importante pa pueblo cu e proyecto aki lo no encera inversion di Gobierno y tampoco e lo ta un proyecto PPP. Desde inicio semper a papia di un Build Own Operate (BOO) financial model, cu ta encera: e compania cu kier participa mester por haci esakinan: construi, ta doño y opera (Build, Own, Operate).

E sistema aki ta similar na esun cu a haci mas di 10 aña pasa pa loke ta trata e molinanan di biento na Vaderpiet. Pais Aruba no a hinca ningun florin den e proyecto, e compania cu a construi esaki a opera esaki, ta doño y ta bende e coriente na WEB. Cual ta e formula tambe pa e incinerator. Esaki ta hopi imporante pa comunidad ta na altura di dje, pues cu Gobierno lo no financia e proyecto aki, ni tampoco drenta den un acuerdo di proyecto PPP. NOTA: e potret ta di archivo di e reunion teni na july ultimo pa atende e asunto cu e stakeholdernan.