Elmar victima atrobe di hortamento di koper

ORANJESTAD - Un biaha mas Elmar a bira victima di hortamento di koper. Separa cu tur tipo di ladronicia ta contra ley, den e caso aki, horta waya nan i bara nan di koper di N.V. ELMAR ta hopi peligroso y por tin consecuencia te hasta fatal pa e ladron. N.V. ELMAR kier enfatisa cu tin voltahe nan halto (12000 Volt) den e trafohuisnan. Asina mes, hopi ta sigui purba nan suerte y ta causando daño grandi na e compania y na clientenan cu ta keda sin coriente.

Si antes e casonan aki tabata sosode sporadicamente, awendia e ta sosodiendo semanalmente, den cual ladronnan ta ataca specialmente e Trafohuisnan di N.V. ELMAR pa horta tur loke nan por haya di koper den nan. E ladronnan obviamente tin un poco conocemento di coriente si, pasobra nan sa precies cua waya pa mishi cune y cua no. Locual nan no ta tene cuenta hopi biaha cune ta, cu tin cliente riba e red y cu asina nan corta e waya nan di koper nan ta causa molester y inconveniencia na clientenan di e compania nacional di distribucion di coriente. Lastimamente seguro no ta cubri e daño di e aparatonan pa e clientenan cu a keda afecta.

Algun dia pasa ladronnan a drenta horta den e mesun Trafohuis dos biaha tras di otro. Consecuentemente, N.V. ELMAR a hay’e ta adapta nan maneho pa cu halamento di waya di koper. Ta warda te na ultimo pa hala e waya pa despues pone coriente riba dje, pasobra si haci esey prome, pa ora nan regresa pa pone coriente, ya waya nan di koper a disparce caba. Es mas, tin algun caso den cual ta horta e waya di koper toch, a pesar cu tin coriente riba dje caba!

No tin distincion den areanan unda ta raporta e mesun tiponan di ladronicia aki, pasobra e ta sosodiendo den tur districto. Ultimo casonan raporta ta na San Nicolas unda cu a horta na e Trafohuis situa den Diamantberg Weg y na otro situa cerca di Palo Marga. Tur e casonan aki ta den man di Polis, cu ta haciendo nan investigacion.

N.V. ELMAR ta lamenta e casonan aki masha y ta haci un apelacion dramatico riba comunidad pa duna un man den preveni e tipo di casonan asina. Ta pidi un y tur pa, asina cu nota movecion straño banda di nan instalacionnan, pa avisa Polis mesora y yama N.V. ELMAR tambe pa por manda tecniconan na e sitio. Ta hunto so por yuda combati y preveni hortamento di koper, for di e instalacionnan di coriente di N.V. ELMAR.