Bapor prohibi pa yega Venezuela, ta na caminda pa Aruba

PANAMA –E bapor cu Venezuela a denuncia di ta wanta den Panama Canal cu ayudo humanitario, a sali diabierna pa Aruba. Asina Prensa Latina ta raporta riba e portal di Marine Traffic. Manera cu noticiacla.com a raporta un dia anterior, e vice presidente Venezolano Delcy Rodriguez a raporta cu e compania di seguro di e bapor, a demanda un cambio di curso, pa cumpli cu e blokeo impone pa Merca riba Venezuela.   

DESTINACION

E destinacion actual di e bapor, si no ta un stopover, ta confirma e denuncia di e gobierno Venezolano di e aplicacion di e medida impone pa autoridad Mericano. Mientrastanto e organo cu ta controla e Panama Canal, Panama Canal Administration (PCA) a distancia su mes di e incidente y a raporta cu e bapor cu e carga di soja a cuminsa su transito via Panama Canal pa Atlantico.