Van Dishoeck: A resolve reto di mal comportacion di mariniernan na Aruba

ORANJESTAD – E reto di e mal comportacion di mariniernan na Aruba ta parse di ta algo di pasado. Segun comandante saliente di Marinierskazerne, Timon van Dishoeck, e tabata un reto entre 2016 y 2018 pa Marinierskazerne. E ta un asunto cu e ta lamenta cu e mester a experencia y atende cune. De hecho ta un di e unico cosnan negativo di su periodo na Aruba cu e ta relata durante e programa Noticiacla LIVE e siman aki. Pero awor na su regreso pa Hulanda, e problema ey ta parse di ta algo di pasado. 

MARINIER BOU DI INFLUENCIA

Durante su prome aña y mey como comandante, van Dishoeck ta splica cu e mester a manda por lo menos 10 marinier Hulandes bek pa Hulanda, debi na nan mal comportacion. E comportacion en cuestion ta varia di bringamento of envolvi den accidente di trafico, a consecuencia di ta bou di influencia di alcohol. 

LASTIMA

Van Dishoeck ta lamenta e hechonan aki pasobra e hombernan envolvi no ta mal hende. Nan ta bon militar cu simplemente a kere cu nan por a pusha e limite di nan resistencia mas halto. Y segun e comandante, e ta hopi streng mes pa cosnan asina y no ta tolera e comportacion aki. E ta mustra asina cu tin consecuencia pa cosnan cu ta wordo haci malo. “Mi ta lamenta esaki si (esta cu e ta sosode)”.  

MARINIER TA KEDA HENDE

Segun e comandante, marinier tambe ta hende y hende ta keda hende. Berdad, tin e percepcion cu mariniernan, military, soldat ta hende cu ta hopi strict, tin un disciplina increibel y un condicion spectacular. Y cu tipo di comportacion asina, esta di bebe burachi y causa destruccion, simplemente no ta posibel den e grupo aki. Pero e realidad ta otro. Hendenan cu ta militar, of cu ta wordo recluta pa bira military, ta hendenan particular, cu sa con pa actua, no tin miedo di nada, y cu ta gusta surpasa e limite den situacionan dificil. Pero lamentablemente, ta e mesun cualidadnan aki, ta pone cu algun ta usa e cualidadnan ey pa test nan limite den otro cos, por ehempel bebemento. E comandante mes ta splica cu e como persona, ta usa e deporte di mountainbike pa deshaci di stress y deshaci di energia extra. Otronan ta hacie di otro forma. “Y si bo kima bo mes, bo tin cu sinta riba bo blaar”. E ta realisa tambe cu ora cu mariniernan bira noticia asina, e ta haya mas atencion cu un accidente normal. Y como tal van Dishoeck ta actua severo pa proteha e reputacion di e kazerne.

CASTIGO

Unabez cu un military Hulandes comete un infraccion na Aruba, ta atende mesora cune y ta manda nan mesora pa Hulanda. Nan ta keda militar, depende si kico e infraccion ta. Bebe burachi no ta un ofensa legal. Pero den caso e bira un ofensa legal, nan ta wordo persigui pa ley, y por haya un multa of un castigo cu ta conforme e ofensa. Tambe nan tin cu aparece dilanti un commission military cu ta scucha nan y ta duna un conseho. “Pero hopi biaha no ta trata di hendenan malo. Solamente cu nan a comete un fayo riba un momento. E ora ami ta pensa miho mi manda nan bek, cu ta causa un efecto di shock” e comandante ta bisa. Nan ta siña nan les y no ta hacie mas, mas probable. Y ta prefera di manda nan bek ‘henter’, envez di manera a sosode algun aña pasa, den un caha di morto y mester trece e mayornan pa confronta cu e situacion lamentable.

MANEHO A YUDA

Mes momento e comandante ta bisa tambe cu e tactica usa, a yuda, pasobra e ultimo aña y mei, e no mester a manda militarnan Hulandes bek pa Hulanda. Pues e medidanan a duna nan efecto segun van Dishoeck. “They got the message”. Pero e ta conciente y no ta pretende cu tur hende ta core bay cas netchi sin bebe, pero nan sa hopi bon awor kico e consecuencianan ta si nan haci dimas, y cu si algo pasa, kico ta pasa cu nan.