Marinierskazerne kier bay opera 100% riba energia sostenibel

SAVANETA – “E intencion ta, pa haci Marinierskazerne 100% sostenibel di energia solar”, asina e comandante saliente, Timon van Dishoeck, a bisa den e programa NoticiaCla LIVE diahuebs. E intencion tabata pa logra esaki durante e periodo di van Dishoeck mes, pero pa motibo fuera di alcanse esaki no a logra ainda. E ta sigur cu pa otro aña e kazerne por genera su propio energia y asina bira ‘independiente’ riba e tereno ey. 

PROPIO ENERGIA

E comandante tin dos motibo pa kier logra su meta. Militarmente mira esaki ta algo bon cu nan por haci nan trabou, los di tur hende y no mester ta dependiente di ningun hende. Mester pensa p.e. ora cu no tin coriente, e militarnan mester por sigui haci nan trabou, manera: provee seguridad y tur otro trabou cu nan tin cu haci. E otro punto ta, pa e motibonan ideologico. E ta bon pa hende realisa cu no mester depende solamente di combustibel fosil, pero cu tambe por tin otro tipo di energia, cu ta menos dañino pa nos medio ambiente. 

A LOGRA

Van Dishoeck lo kier a wak na momento di su regreso pa Hulanda, cu e kazerne tabata yena di e panelnan solar caba, generando suficiente energia cu por a pone ‘off the grid’. “Esey no a logra. Esaki pasobra e.o. na Hulanda tin un ‘molina gubernamental”. Loke si e comandante a logra ta, pa convence prome minister di Aruba, cu ta mes momento Minister di Energia, pa sostene e kazerne den su ambicion. Tambe a logra combersa cu WEB y ELMAR, di cual nan tambe ta sostene e plan. A logra haya sosten di Minister di Defensa di Hulanda, cu a ofrece fondo pa esaki. E ta bin. E proceso a tranca un rato na Den Haag, no necesariamente red tape, pero awor cos ta moviendo. Tin te hasta un proyect manager, cu ta ocupa su mes cu e asunto y ta bay guia e proceso pa hunto cu Aruba, esaki bira un realidad. A uza un lema interesante esta: Hulanda ta inverti y Aruba ta siña”.

VIGILA DEPOSITO

Un otro aspecto interesante segun van Dishoeck ta, cu si no mester depende mas di e fuel cu ta bin Aruba awor, e ora no mester ‘cuida’ e suministro di e combustibel ey. “Pues si nos no mester uza hende pa cuida e suministro ey, nos por uza e hendenan ey pa haci otro cos cu por ta ta miho. P’esey militarmente ta algo sabi, y tambe ideologicamente. Si bo reduci e dependencia di energia, e ta haci bo menos vulnerabel y ta mihor pa e medio ambiente” van Dishoeck a bisa finalmente.