Preparando pa e di 11 edicion di Aruba International Regatta

ORANJESTAD - Riba dia 17 y 18 di augustus e di 11 edicion di e Aruba International Regatta ta tuma lugar na Surfside Beach. Ta dedica e weekend na caredanan entre yatenan, beach cats, sunfish, optimist, windsurfing y otro typo di boto di bela. Tambe tin 3 anochi cu musica y fiesta pa tur participante y pa deleite di e publico presente. E anja aki atrobe e overall Copa ta bai pa e ganador den e clase mas competitivo. Hobennan por participa den e clase di Optimist, Sail Qube y F-11, boto di vela pa principiante. Caredanan di largo distancia ta ser organisa pa windsurfers y na Gouverneursstrand Fundacion Rancho ta organisa caredanan y un workshop di micro boat.

E organisacion ta organisa un regatta center na Surfside Beach pa sigura cu e participantenan y publico presente por disfruta di e pustamentonan spectacular riba laman y kant’i laman. Tin musica y a percura pa tin hopi sombra. E Aruba International Regatta no ta solamente un evento pa e participantenan pero tambe ta e lugar perfecto pa bin topa otro entre 17 – 18 di augustus. Esnan cu kier sigui e caredanan, kant’i laman ta cordialmente invita pa bin probecha di esaki den un ambiente ameno y relaha. Pa tres ana consecutivo Aruba Regatta Foundation a ricibi e Gold award di Sailors for the Sea – Clean Regatta; e edition 2019 atrobe di e regatta ta dedica pa “reduce, re-use y recycle” pa sigui mantene nos regatta limpi y sostenibel. 

Tur e caredanan di e evento y competencianan ta tuma lugar kant’i laman na Surfside y e actividadnan di Fundacion Rancho ta tuma luga na Gouverneursstrand. Mayoria di e participantenan ya caba ta cla cu nan preparacion pa e competencianan y tin un cantidad substancial di participante international cu a inscribi caba. Pa mas informacion, bishita nos website www.aruba-regatta.com of facebook https://www.facebook.com/arubaregatta.