Fazio: Expande y bula ruta robes ta pone cu aeroliñanan local ta kibra

ORANJESTAD – “E problema cu e aeroliñanan local (di Aruba) ta cay na caminda, ta entre otro, cu nan ta bira ‘mucho grandi’ y ta drenta e mercadonan den cual nan no por competi”, asina director saliente di aeropuerto, James Fazio, a bisa recientemente den e programa Noticiacla LIVE, unda e tabata referi na entre otro: Air Aruba, Tiara Air y ultimo Insel Air Aruba. E forma ta pa keda chikito, cu e avionnan apropia y e rutanan regional of interisular. Di otro forma, e situacion ta sali for di man y e aeroliña no ta sobrevivi.

CON PA HACI

“Si bo cuminsa cu un aeroliña chikito cu e tipo corecto di avion, interisland of regional, bo ta opera den un mercado cu ta captivo, sin hopi competencia y bo por ta hopi exitoso y gana placa den e mercado ey”, Fazio –, e mesun piloto di avion chikito-, a bisa. E problema ta cu unabes cu e aeroliñanan ey haya poco exito, nan ta traduci e exito ey den e pensamento cu nan mester bay mas den grandi. “Ban busca avionnan mas grandi, ban cuminsa bula jet”, Fazio ta bisa. 

BULA ENTRE ESUNNAN GRANDI

Unabes cu bo cuminsa bula di Aruba pa Miami, bo ta den caminda di e gigante American Airlines, cu sa con pa competi. Ora cu bo bula Newark, bo ta topa United Airlines, bo cuminsa bula Europa, bo ta topa KLM. “Esakinan ta e aeroliñanan hopi madura, cu hopi infrastructura, hopi forza financiero y esey ta e comienso di e final (pa e aeroliñanan chikito local)” Fazio ta sigui bisa. 

EHEMPEL DI FAYO

Por corda con Air Aruba a cuminsa bula e buelonan pa Europa y Merca, e rutanan largo y dentro di poco, mientras cu e tabata mustra bunita y impresionante, e decision ey a causa nan morto tambe. Y asina e otro aeroliñanan local cu a sigui, tambe a sigui expande, sea den ruta of e ekiponan, cu ta sea mucho costoso pa opera y of no tabata e rutanan productivo. Y e mercado Venezolano tabata un gran motibo, pa cual e ultimo aeroliñanan a fracasa na caminda. Hopi di nan tabatin como e modelo comercial principal, pa bula e rutanan Venezolano. Pero ora cu Venezuela a cuminsa retene placa, cos a caba pa hopi. 

KICO TA E MAGIA

E magia atrobe, ta pa keda simpel. No bira mucho grandi, keda den un mercado cu ta exitoso. “Tin un mercado hopi grandi entre e islanan ABC y St. Maarten. E ta funciona. E aeroliñanan cu ta bula e mercado ey, ta sigui exitoso y ta hacie cu e avionnan corecto” Fazio a bisa. Bula cu e avionnan grandi, ta complica cos. Entrenamento di tripulacion, e gastonan grandi, mantenimento, competencia cu e aeroliñanan grandi, tur ta e factornan, cu por kibra un aeroliña chikito local.