Huida di prisonero a pone presion riba gobierno pa actua pa haya prison nobo

ORANJESTAD – E huida di e ultimo preso na KIA a pone gobierno bou di presion, di tal forma cu e minister responsabel pa KIA, Andin Bikker a dicidi pa manda carta urgente, pa Hulanda pa haya ayudo pa un prison nobo. Segun e mandatario, den un comunicado diamars, “despues di varios intento pa haya conseho di CFT pa traha un KIA nobo, awor a dicidi di no warda mas, pero bin cu peticion pa expresion di interes, pa bay mercado y mira si tin interes pa yega na un instituto nobo “. Deterioro di e facilidad, falta di personal, tur ta motibonan, cu ta conduci na e situacionnan, unda cu r cosnan por pasa, manera huida di un preso. Asina e carta por lo menos ta indica. 

CARTA DIARANSON

Diaranson mainta Minister Bikker lo a reuni cu conseho di Minister, pa asina traha un concepto di carta, pa informa Hulanda riba e urgencia pa bin cu un prison nobo. “Tempo di e gobierno anterior tambe tabatin caso di persona cu a huy y no a haya nan mas y awor ta spera cu pronto por haya Martina” e comunicado ta sigui bisa. Pero e reto ta keda cu e instituto ta hopi deteriora y los di esey tin scarsedad di personal, unda hopi persona ta draai orario di warda largo. Riba e scarsedad di personal Minister Bikker ta bay haci un apelacion na Conseho di Minister, pa purba haya mas hende pa asina yuda y evita cu tipo di e escapenan asina ta pasa. 

MEDIDA TEMPORAL

Por lo pronto lo bay trata di reenforsa e puntonan debil cu por tin y pa medio di  camara y drones yega na mas vigilancia cu ta bay implementa den e proximo simannan. Tambe ta bay tin cierto restriccion pa e detenidonan, pa evita cu esaki sigui pasa. E ta keda un hecho cu un instituto, cu a keda diseña varios decada pasa, ya no ta cumpli cu e exigencianan di aña 2019 bay ariba.  E reto ta keda e aspecto financiero cu e gobierno actual a hereda. 

PRISON NOBO 

Tin hopi gana di ehecuta diferente proyecto, pero pa loke ta e prison nobo no por yega traha e instituto facil, pasobra tin un reto financiero segun e mandatario. Ta spera cu otro siman lo publica e peticion pa expresion di interes y via e reaccionnan por bay mas pronto cu ta posibel, pa pone e prome bloki pa e instituto penitenciario nobo.