Aki dos aña Aruba su aeropuerto lo tin un hende local na cabes

ORANJESTAD – Si tur cos cana bon, aki dos aña, mas tarda 3, Aruba lo tin un CEO local na cabes di nos aeropuerto. Asina e minister responsabel pa nos aeropuerto, Dangui Oduber, a bisa Noticiacla.com diaranson mainta. E ta reacciona asina riba e raportahe di e portal aki di algun dia pasa, unda cu e CEO saliente James Fazio a bisa, pakico ainda no por a pone un CEO local na cabes di aeropuerto. Royal Schiphol Group, cu ta maneha nos aeropuerto, a presenta e persona Joost Meijs, cu a keda aproba pa gobierno di Aruba. E aeropuerto a caba inicia un proyecto miyonario di expansion y renobacion pa e proximo 5 añanan, y Meijs tin experiencia cu renobacion di Eindhoven airport. 

ARUBIANO NA CABES

“En todo caso ta mas cu logico cu gobierno kier apunta un Arubiano como Ceo di aeropuerto” Oduber a bisa e portal aki. E ta referi tambe na e hecho cu e proyecto Gateway 2030 ta bay cuminsa y ta un proyecto hopi importante pa aeropuerto, turismo y nos economia. Esey tabata e motibo, cu ainda no tin un CEO debi cu e mester tin experiencia tambe den maneha un proyecto di construccion di un aeropuerto. Pa kita duda di e acuerdo cu si mester tin preparacion pa un local of no, Oduber a bisa cu tin un partnership cu Royal Schiphol Group pa mas cu 15 aña y cu semper e comprendemento tabata, cu un dia Aruba lo apunta un persona local como CEO. “Durante e negosacion pa apunta e CEO nobo cu lo cuminsa dentro di algun siman, a yega na un acuerdo cu Schiphol, cu esaki ta e ultimo CEO cu Schiphol ta propone y ta cuminsa mesora cu e reclutamento y seleccion di un local pa asina e caba hunto cu e CEO actual y cuminsa cu e proceso di incorporacion” Oduber a sigui bisa. Segun e mandatario, e intencion ta, pa aki 2 (aña) mas tarda 3 aña, Aruba apunta un local como CEO di nos aeropuerto.