Minister Plenipotenciario na Hulanda a cuminsa bishita e studiantenan nobo

DEN HAAG  – Minister Plenipotenciario pa Aruba na Hulanda, Guillfred Besaril, a cuminsa e siman aki cu su ronda di bishita na e studiantenan nobo di Aruba, despues cu esakinan a yega Hulanda recientemente. E prome dos gruponan tabata di Utrecht y Leewarden. 

Na ambos grupo, (y lo tin mas bishita sigur) e mandatario den su discurso na e studiantenan a enfatisa riba e aspecto pa haya e balans entre estudio y tempo liber. ‘Purba saca lo maximo di bo estadia na Hulanda. Estudio ta sumamenta importante, pero banda di esey bo mester hiba un bida social, pa asina trece balans den bo bida. Esaki ta hopi bon pa bo desaroyo mental,’ asina minister Besaril a bisa e studiantenan.

Sr. Besaril tabata hopi cla den su aviso pa e prome aña no bay Aruba cu vakantie. ‘E prome lunanan ta e momentonan crucial pa bo estudio; bo enfoke mester ta riba esaki. Banda di esaki na e mesun momento bo mester cuminsa adapta na e bida na Hulanda.’

‘Disfruta di e opvang y purba na cera hopi amistad, cu por ta hopi positivo den e prome aña. Hopi biaha esakinan ta e amistadnan cu por ta duradero. Mi ta papia di mesun experencia dia cu ami a bin studia na Hulanda. Cu te awe, ainda mi tin algun di e amistadnan ey’ tabata e comentario di minister Besaril.

E mandatario a bisa e studiantenan cu nan mester ta consciente di e hecho cu nan a caba un EPI, HAVO of VWO y esey ta nifica cu nan tin e potencial pa sigui un estudio avansa na Hulanda. Besaril: ‘Aruba a deposita confiansa den boso; saca probecho di esaki. Na otro banda, tene cuenta cu boso lo encontra e retonan riba boso caminda. No keda cana rond cu pregunta of problema, pero acerca bo mentor, e miembronan di boso POC of Arubahuis. Bin padilanti cu bo problemanan, pa bo por haya e ayudo necesario y na tempo.’