‘Celebracion’ di entrega di lista electoral por pasa pa historia

ORANJESTAD – Si gobierno aproba e cambionan sugeri pa Censo y Conseho Supremo Electoral, Aruba lo conoce un cambio drastico pa e proximo eleccion. Entre e cambionan grandi ta, e entrega di lista y e ‘kiezersregister’. Hopi biaha e entrega di lista ta uza pa e partidonan midi nan forza prome cu eleccion y asina ‘warm up’ nan hendenan, pa cu e campaña. Algo cu aworaki por pasa pa historia. E decisionnan ey no ta tuma ainda, pero ta evaluando nan huridicamente. 

GASTO PUBLICO INNECESARIO 

Un di e motivacionnan pa cu e cambionan, segun hefe di Censo y alabes secretario di Conseho Supremo Electoral, (CSE) Sharin Luydens, ta pa evita gastamento innecesario di e fondonan publico, pa cual Censo di Aruba a manda gobierno un lista di cambio proponi pa eleccion. Esey ta pensamento di e secretario di Conseho Supremo Electoral, Sharin Luydens, na NoticiaCla.com diamars mainta. Mientras e decision pa pasa pa votamento electronico a haya aprobacion di Conseho di Minister, e otro peticionnan lo bay e departamento huridico di gobierno (DWJZ) pa conseho. E lista di proposicion ta encera entre otro; cambio di kiezersregister, cambio di proceso di entrega di lista y cambio di e constelacion di e conseho electoral. 

KIEZERSREGISTER

Un di e cambionan proponi ta, pa e asina yama ‘kiezersregister’. Aworaki e proceso di eleccion ta, cu tin e kiezersregister, cu ta uza durante e dia di eleccion. Ta uza e lista aki cu nomber y informacion di tur hende, y ta grita e nomber aki pa tur hende tende. “E proceso aki no ta di e tempo aki mas y contra tur ley di privacidad internacional”, Luydens a bisa. Un proceso electronico y mas eficaz ta, haci e trabou hopi mas liher y mas ‘priva’ tambe. 

CAMBIO DI ENTREGA DI LISTA

Henter e proceso di entrega di lista aworaki ta uno costoso, cu ta rekeri uzo di fondo publico innecesario, siendo cu por hacie den un forma hopi mas practico. Mester pensa riba e.o. overtime di polis, Censo y tambe e gastonan extra pa e partidonan politico, aunke e ultimo aki no ta pa Luydens, pasobra e politiconan mester sa kico nan ta haci. Pero segun Luydens, como profesional, e tin cu mira e bienestar di e fondonan publico y e organisacion y como tal a sugeri pa haci esaki den un forma digital, unda cu ta manda e listanan electronicamente y asina ta scapa hopi tempo y placa. 

CONSTELACION DI CSE

E constelacion di e Conseho Supremo Electoral tambe mester cambia, pa cual a trece un sugerencia. Si aworaki ta uzando e hefe di censo como secretario di CSE y asina tin otro cu tin e funcionnan diferente temporal, e sugerencia ta, pa e conseho tin su propio ‘raad’. Y como tal a sugeri pa esaki tuma lugar legalmente y no ta e ora ‘uza’ e personanan temporal pa haci e funcion aki. Potretnan ta di archivo di NoticiaCla.com durante e ultimo entrega di lista. A scohe e partidonan cu tin asiento actualmente den Parlamento.