Luydens: Cu votamento eletronico, resultado por ta cla den mey ora

ORANJESTAD – “Un di e bentahanan practico di tin votamento electronico ta, cu den mey ora pa un ora, despues cu e urnanan electoral cera, e resultado ta conoci. Esaki ta conta tambe p’e resultado di e votonan individual”, asina e secretario di Conseho Supremo Electoral, Sharin Luydens, a bisa NoticiaCla.com diamars mainta. E ta reacciona despues di e primicia di NoticiaCla.com cu gobierno a dicidi cu proximo eleccion, lo ta electronico. 

GASTO INNECESARIO 

Un motibo ainda mas importante cu haya e resultado mas liher ta, cu segun Luydens, e votamento electronico ta evita ‘gasto innecesario di e fondonan publico’. Ta referi na e gastonan, manera; overtime pa polis, censo y otro asunto cu ta relaciona cu eleccion. Den su reaccion, Luydens a splica e beneficionan, pues di tin votamento electronico, cu ta scapa placa grandemente y ta mas ‘eficaz’ y preciso. Sigur den e temponan moderno aki. Miedo pa fraude no ta existi practicamente, pasobra mescos cu tur otro proceso, ta sigura cu e proceso ta uno cu ta conta cu un lista di punto, pa e por ta optimal. Segun Luydens, e mester ta un proceso sigur, preciso, controlabel, tin autenticidad, anonimo y eficaz. Si e puntonan aki ta garantisa, e ora no mester tin ningun preocupacion pa problema. 

E PROCESO

E proceso ta encera entre otro, cu en bez cu e votador ta marca su voto via un potlood cora, e ta marca su voto via un aparato electronico, ta saca e prueba riba papel y ta deposita su voto di papel den e buzon. Ta reemplasa e stembiljet cu un EVM, esta un Electronic Voting Machine of un mashin electronico di voto. E conteo lo sigui via stembus, uzando un scanner, pues un ‘stem teller’. E proceso ta nifica cu esaki lo ta uno hopi mas liher, garantisando productividad y ta mas ‘sigur’ (evita fout humano relaciona cu p.e. cansancio debi na e oranan largo di trabou) y consecuentemente ta keda cla mas liher.