Meteo: Aviso pa lama bruto ta na vigor pa Aruba

ORANJESTAD - Un aviso pa boto chikito y lama bruto ta na vigor y lo keda valido te diahuebs. E areanan afecta principalmente lo ta costa oost te zuidwest, costa di Arashi, high rise y low rise hotels.

SINOPSIS 

Un ola tropical bastante activo ta pasando den area di Caribe, cu mayoria di tempo ta activo na e parti noord di nos region. Sinembargo, e sistema aki ta trece un aumento di biento y lama den su paso bayendo west. Esaki lo bay causa cu lama lo ta bastante bruto na nos costanan, cu normalmente ta trankil, caminda e olanan por yega 5 te 9 pia. Segun e sistema ta bayendo west, e olanan lo baha durante e proximo dianan.

ACCION DE PRECAUCION 

E uzadonan di e facilidadnan di lama y e doñonan di boto chikito ta avisa, pa tene cautela principalmente cerca di e area di e costanan oost te zuidwest.