FCCA a traspasa cas pa Fundacion Adopt an Addict

ORANJESTAD – Durante un reunion recien, “Fundacion Adopt An Addict” a ricibi e noticia, cu tur cos a keda cla pa locual ta trata e cas na Moko, unda cu nan ta brinda nan servicio pa esunnan den adiccion. Tur esaki ta danki na e cooperacion entre Ministerio di Infrastructura y FCCA, cu awe Fundacion Adopt an Addict por sigui traha y expande nan servicionan y yuda mas persona den adiccion.

Pa mas o menos 8 aña e fundacion ta purbando pa haya e cas, caminda cu nan ta opera for di dje na Moko, for di FCCA, cu ta doño di e cas. Minister Otmar Oduber a expresa di ta haya e plannan di e fundacion, pa loke ta nan metanan, ta mustra di tin hopi seriedad cu posibilidad y e deseonan di expansion y continuacion di nan trabou den comunidad.

Den e dialogo cu a tuma luga, Minister Oduber, como e Minister encarga conhuntamente cu FCCA, a yega na e acuerdo cu ta traspasa e cas aki, cu ya e fundacion ta uzando actualmente, na un forma oficial.