Segun minister: 'Insistencia di CAFT lo mata Sociaal Crisis Plan'

ORANJESTAD – E hecho cu e Colegio di Supervision Financiero di Aruba (CAFT) ta ‘haciendo dificil’ cu e Crisis Plan Social (SCP) y por pone e mesun plan aki su continuacion na peliger. Asina e mandatario responsabel pa e proyecto aki, Glenbert Croes, a bisa NoticiaCla.com dialuna durante un conferencia di prensa. Segun e mandatario, si CAFT insisti di sigui cu su plan di scrutina e SCP, esey por ta e fin di e plan tambe. “CAFT su insistencia lo mata e Crisis Plan Social” Croes a bisa. No ta man di e minister nan ta marando, sino cu CAFT kier mara e man di SCP, segun Croes. 

TRABOU DI CAFT

E ta compronde cu CAFT tin un trabou pa haci, debi cu e gobierno anterior a hinca Aruba den un situacion financiero fastioso, esta di supervisa e situacion financiero di pais Aruba. Pero esey no kiermen cu mester bay forza algo cu no por. Aworaki e plan ta operacional, pero si CAFT sigui insisti den implementa cierto cambio y pone pia abou, pa reduci ainda mas gasto, esaki lo ta e fin tambe di e plan. Esey lo crea mas problema social y trece Aruba den un situacion hopi mas precario di loke e ta caba.  

CAFT Y SCP

For di un comienso, CAFT a mustra su preocupacion pa cu e plan social y e forma con gobierno kier implementa esaki y tambe con ta atende cu e presupuesto. Inicialmente a pidi gobierno pa CAFT tambe haya acceso na e presupuesto (apart) di e plan y cu e gastonan ta mucho hopi. CAFT tin un preocupacion serio cu e plan aki y ta kere cu e forma cu gobierno ta atendiendo cu esaki, no ta esun mas corecto. Esey siendo cu segun gobierno, a establece suficiente mecanismo di control, pa por percura cu cos ‘no bay for di man’. Y asina mes, CAFT ta insisti cu nan kier mas control y ahuste di e plachi financiero. Algo cu segun e mandatario, riba pregunta di NoticiaCla.com, kico por pasa si CAFT sigui ‘insisti’ y haya nan gana, ta bisa cu por ta e fin di e Sociaal Crisis Plan.