Oduber: San Nicolas Visitor Information Center ta operacional bek dia 19 di augustus

ORANJESTAD - E oficina di turismo na San Nicolas of e asina yama Visitor Information Center (VIC) a cera prome di juli, debi na vencemento di e contract cu sr. Berenos. No tabata e intencion pa esaki a cera na ningun momento, pero e proceso a dura mas cu a anticipa. Manera ta conoci e infrastructura di e edificio di VIC a keda ful renoba recientemente, haciendo esaki hopi mas moderno. Minister Oduber a duna di conoce cu e VIC lo ta operacional bek dia 19 di augustus y esaki sigur ta un bon noticia pa Sunrise City.

E VIC lo bay consisti di 2 trahador di cual 1 trahado ta traha paden y 1 trahador lo traha como tour guide. E dos trahadornan aki a cumpli cu tur e exigencianan di ATA. E VIC lo opera di dialuna pa diabierna dentro e orario di 9am pa 5pm. Na e VIC e turista lo ricibi tur informacion di kico tur San Nicolas tin di ofrece. E tour guide lo comparti su conocemento cu e turistanan na un manera profesional y lo brinda varios recorido, manera un recorido di e murayanan di arte den mainstreet.

San Nicolas ta rico den historia, cultura y arkitectura, e turistanan por haya un refleho di e bida diario di e habitantenan di San Nicolas. San Nicolas ta un ciudad bieu y alaves nobo, fuerte y tradicional, pero semper evolucionando. Minister Dangui Oduber ta kere den e potencial di San Nicolas y lo percura pa San Nicolas haya su fair share. E oficina sigur ta complementa e otro bunita proyecto di Baby Beach, cu dentro di poco lo tin groundbreaking. San Nicolas ta hayando e atencion cu sigur e merece. Potret. cortesia Hilario Donker