Premier Wever: Votacion electronico ta garantisa transparencia y integridad

ORANJESTAD – Segun premier Evelyn Wever Croes, votacion electronico ta garantisa transparencia y integridad. Cu esaki e mandatario kier desbarata e pensamento, cu e proceso aki lo ta malo. Siman pasa tabata NoticiaCla.com cu a presenta e informacion aki como primicia, y cu despues a haya hopi reaccion; bon y malo. E informacion tabata, cu pa proximo eleccion, pueblo lo vota di forma electronico. 

INTEGRIDAD Y TRANSPARENCIA

Den un comunicado dialuna, e mandatario a sigura cu e gabinete kier pone innovacion como un punto di salida, pa garanisa integridad y transparencia, cu pocopoco ta birando realidad. “Den esfuerso pa logra e-Government y digitalisacion, Conseho di Minister a tuma e decision pa Aruba tambe bay over na votacion digital y electronico ya pa e siguiente eleccion” e comunicado ta sigui bisa. 

POTLOOD CORA NO MAS

Cu Votacion Electronico lo no vota cu un formulario y potlood cora mas, sino lo vota den un mashin di votacion electronico. Manera cu bo yena bo voto den e mashin, esaki lo ta registra y di biaha lo bo ricibi e recibo di bo voto cu lo bo deposita e ora den e buzon, cu tin den e stembureau y asina tur ciudadano ta cumpli cu su votacion manera semper. 

CONTROL 

Manera semper, e pueblo votado lo ricibi su stemkaart na cas. Dia di votacion e ta bay na e stembureau, unda cu ta indica pa vota. Lo controla si su documentonan ta na ordo y despues e ta drenta den un hoki y ta haci su votacion den un mashin di votacion electronico. E mashin ta saca su recibo di voto cua e votador ta deposita den un buzon pa conteo manual. E unico cu a cambia ta e introduccion di mashin di votacion electronico na luga di e formulario y potlood cora. 

TRANSPARENCIA Y INTEGRIDAD

Prome Minister Evelyn Wever-Croes a duna di conoce cu votacion electronico ta garantisa transparencia y integridad den nos sistema di votacion. Tambe votacion electronico lo elimina e posibilidad di e votonan invalido contrario na votacion cu nos conoce, si e ronchi no ta yena bon of si a scrap riba e formulario of yena mas di un ronchi, cu ta hacie bira un voto invalido. 

PAPER TRAIL

Gobierno a mira tambe importante pa garantisa transparencia y integridad, pa hunto cu votacion electronico, introduci e ‘paper trail’, cu ta e sistema cu ta permiti cu e mashin di votacion electronico pa registra cada voto y entrega di biaha e recibo di voto na cada votado como prueba di loke a vota. Recibo cu, despues cu e votado controla cu ta cuadra cu loke cu el a vota, e mester deposita esaki den e buzon. Ora cu votacion cera, lo haya sa e resultado electoral hopi mas lihe. Pero lo haci tambe e conteo manual di e recibonan di e buzonnan pa controla y verfica cu esaki ta cuadra cu e votacion electronico. Tanto e votacion electronico como e recibo di e votacion, ta keda den secrecia di e votado.

SISTEMA NO COMPLICA

E sistema electronico di votacion no ta un sistema complica. Nos grandinan lo por traha facil cu ne, y tambe tin e posibilidad pa haya asistencia di un persona di su confiansa si en caso di berdad e no por riba su mes. 

INTERNET?

Votacion electronico no ta votacion via internet, cu ta un paso hopi adelanta cu masha poco pais ta uzando. Estonia den e caso aki, ta haci votacion via internet y ta un di e poconan den Europa, cu ta haci uzo di e posibilidad aki. Gobierno di Aruba kier trece un sistema mas husto y transparente, y esaki por logra cu votacion electronico. 

A-POLITICO

Prome Minister a enfatisa cu votacion electronico ta cana los for di politica. E ta completamente den man di Censo hunto cu un comision independiente, kendenan ta trahando pa logra realisa e proyecto aki pa e siguiente eleccion electoral na Aruba. Lo no tin infiltracion di niun partido politico. Gobierno tambe ta para un banda y laga e expertonan riba e tereno aki haci nan trabou, dunando asina e confiansa na pueblo, cu esaki ta e miho sistema pa garantisa integridad y transparencia. Pronto Censo lo cuminsa cu un campaña di informacion tocante henter e proceso di votacion electronico.