ATIA: Reunion cu minister no a kita preocupacion riba maneho di desperdicio

ORANJESTAD – Un reunion recientemente cu minister di medio ambiente, Otmar Oduber, a tene cu gremionan comercial riba e.o. maneho di desperdicio, no a kita e preocupacion di e gremio ATIA. Asina e gremio mes a declara dialuna mainta pa medio di un comunicado di prensa. Segun ATIA, a reuni, pero e preocupacion a keda y ta sigui como tal, vigila e situacion. 

WERKGROEP

ATIA a splica tambe cu a peticion di Minister di Desaroyo Teritorial, Infrastructura y Medio Ambiente, ATIA a forma parti di un werkgroep di december 2017 pa januari 2018 cu tabatin como meta, pa bin cu algun solucion pa e maneho di desperdicio a corto, medio y largo plaso. Den e rapport final “Final Report Integrated Solid Waste Management Aruba” a recomenda pa e termino largo bin cu un ‘Request for Information’ (RFI) pa un asina yama “solid waste management facility with thermal, recycling and sanitary landfill”. E werkgroep den su composicion original, a wordo disolvi asina e rapport a keda cla y no a forma parti di e proceso di RFI.

DESTAHO

Algun luna pasa ATIA a tuma nota cu gobierno a inicia un destaho pa yega na construccion di un incinerator. Tambe ATIA a ricibi copia di e rapport di Arcadis (Verwerking van afval op Aruba) di dia 8 di juli 2019 cu ta hopi critico riba plan, pa construi un incinerator na Aruba como solucion pa nos desperdicio. Pa tal motibo ATIA a dirigi un carta na Minister riba dia 30 di juli 2019 treciendo e siguiente observacion-, preocupacion- y preguntanan dilanti: 

•          E problema di procesamento di desperdicio na Aruba ta un problema grave, cu ta rekeri un solucion sostenibel. Minister di Finanzas, Asuntonan Economico y Cultura a publica un “Economic Policy” den cual e ta enfatisa e necesidad di crea un balans entre desaroyo economico y nos naturalesa. Ademas ta menciona “Circular Economy” como un di e pilarnan economico prometedor. Esaki, hunto cu e adopcion di e agenda 2030 di e Sustainable Development Goals di United Nations, ta e desaroyo- y enfokenan positivo cu ATIA ta aplaudi. Parce cu e plan pa construi un incinerator sinembargo, no ta esun mas sostenibel ni ta stimula un “Circular Economy” como pilar economico prometedor.   

•          For di sector priva a bin un solucion alternativo, caminda lo exporta e desperdicio procesa y paketa pa uz’e como combustibel pa un fabrica di cement. E farbrica lo reemplasa uzo di carbon cu e uzo di desperdicio procesa. Den e rapport di Arcadis ta compara cuater diferente metodo di procesa desperdicio y nan impacto riba tereno social, economico, futuro perspectiva y medio ambiente y segun tal rapport un incinerator ta e opcion cu ta score mas abou pa Aruba. ATIA a pidi Minister su opinion riba e rapport aki y si a haci algun estudio comparabel di banda di gobierno, pa e impacto di un incinerator, prome cu anuncia e destaho y si un ke otro ta motibo pa adapta maneho. 

•          Ademas, ATIA a expresa preocupacion riba e hecho cu Minister a anuncia un cambio di ley, den cual lo obliga tur compania cu ta piki desperdicio pa hiba esaki exclusivamente na e compania estatal, Serlimar. Esaki lo duna Serlimar un posicion di monopolio y lo por tin como resultado cu e companianan local, priva y estableci, lo haya nan mes obliga di sera nan porta como cu no tin fluho di desperdicio mas pa maneha recicla y/of exporta. Esaki ta un desaroyo alarmante, ya cu e lo atacha nos sistema di comercio liber y lo crea un precedente indeseabel. Supone cu den un afan pa fortifica Landslaboratorium bin cu un proposito di ley pa “nacionalisa” su servicionan. Kico lo pasa cu e laboratorionan priva y estableci? Nan tambe lo mester sera nan porta? Den opinion di ATIA e cambio di ley pa fortifica e posicion di Serlimar ta bay contra e intencion delinea den e Economic Policy, caminda ta menciona cu mester stimula comercio y ‘entrepreneurship’, pa duna economia e impulso necesario y via esaki aumenta e entradanan di impuesto pa gobierno.

•          ATIA a puntra Minister tambe, si a ahusta e rekisitonan pa cu e destaho publico pa e incinerator di algun forma of otro, ya cu no a ricibi ningun inscripcion pero a dicidi toch pa extende e periodo cu 90 dia. Kizas e falta di interes tin di haber cu e viabilidad y rendabilidad di e proyecto aki, mirando e cantidad limita di sushi cu e isla ta produci?

•          Por ultimo, ATIA a trece dilanti e costo di haci negoshi na Aruba, cu durante e ultimo añanan a bin ta aumenta. A conoce un aumento di BBO y BAZV, a introduci e BAVP, a aumenta salario minimo, e parti cu doño di trabou ta paga pa AOV a aumenta, a his considerablemente e drempel di salario pa AOV/AWW, a conoce inflacion, a corta den e cantidad di e oranan di trabou pa siman, e banconan a introduci e costonan adicional pa compra y benta di moneda stranhero, grondbelasting a aumenta drasticamente, accijns a aumenta y e tipping fee pa comercio tambe a subi substancialmente. Na mes momento, e productividad den e departamentonan di gobierno (cu excepcion di algun) no a mehora y e nivel di e debe nacional ta sigui riba un nivel iresponsablemente halto, sin cu tin plan concreto y conoci pa un y tur, pa cu con lo remedia e situacion financiero di pais Aruba. Realisacion di e proyecto di incinerator lo bolbe trece un costo adicional pa comercio y pueblo, cu na e momento aki no por carga mas.

REUNION CU MINISTER

Riba dia 1 di augustus 2019, riba invitacion di Minister, a tuma lugar un reunion informativo pa varios gremio comercial tocante e proceso di procesamento di desperdicio na Aruba. Durante e reunion, Minister a describi e proceso cu a tuma lugar pa yega na e decision di un destaho publico pa un incinerator y aunke a trata algun di e preguntanan di ATIA durante e reunion, ainda e preocupacionnan di ATIA no ta elimina. Pa tal motibo ATIA lo keda vigila e proceso di e destaho y di cambio di ley y lo keda en espera di e contesta di Minister riba ATIA su carta di dia 30 di juli 2019.