Oduber: Aruba tin oncologo cu a cuminsa traha augustus

ORANJESTAD – Tin un oncologo Colombiano cu a inicia su labor na Aruba entrante 1 di augustus ultimo. Asina minister di Salud Dangui Oduber a contesta pregunta di NoticiaCla.com dialuna durante conferencia di prensa. E ta desbarata e informacion asina di contrincantenan politico cu lo no tin oncologo mas. E informacion tabata di ex premier Mike Eman cu su informacion ta cu lo no tin oncologo na august mas e aña aki. Cu esey e mandatario actual ta purba pone un paro na e informacion incorecto. Segun e mandatario, pa 8 aña no a regla e asunto di oncologo, y awor kier bin papia. Esaki ta pone cu e situacion ey gobierno actual a hereda, y mester a resolve e problema. 

ONCOLOOG

Algun luna pasa, e oncologo Jonkthoff a bin afo cu cierto politiconan, protestando e situacion cu no tin mas y cu e ta bayendo, lagando nos isla sin oncologo. Despues recientemente atrobe Eman a bin dilanti, recordando riba e tema ey, cu tin e posibilidad cu Aruba ta keda sin oncologo.