Gobierno hulandes no a reacciona riba welga di hamber di Mike Eman

ORANJESTAD – E welga di hamber di premier Mike Eman no tabatin efecto riba gobierno Hulandes. Por lo menos, gabinete Mike Eman II no a haya ningun reaccion ainda te cu diasabra merdia. Loke si Eman a logra, ta atencion internacional y sigur den prensa hulandes y region. Den su di dos dia di welga di welga di hamber, Eman ta keda determina pa su causa te ora cu gobernador firma e presupuesto. “Nan no a reacciona” Eman a declara diasabra mainta. Rondona pa su coleganan minister, Eman a mustra cansa, descansando y su stem kibra. “Mi curpa ta menos cu ayera, pero mi tey” e la declara. Controla cada 4 ora pa e personal di ambulance, Eman tabata biba riba awa y ‘vitamin water’, esta e awa cu tin vitamina special aden. “Awa so no ta suficiente” su representante a bisa NoticiaCla.

“No ta berdad cu minpres ta come pastechi of algo otro. Ta awa so (y vitamin water) e ta bebiendo. Nada mas” e reaccion tabata riba e noticia cu toch Eman lo ta comiendo algo. E otro critica den direccion di Eman ta cu e lo ta probechando di e facilidad di un ambulance mientras cu resto di pueblo tin cu paga pa e servicio. Riba e pregunta di ken ta paga pa e servicionan ey, NoticiaCla a haya como contesta cu ‘e ta wordo regla’.

Dialuna mas probable parlamento di Aruba lo trata e ley di emergencia pa gobierno por paga su debenan mas urgente. E ley a pasa tur instancia caba y ta poni pa wordo trata sea dialuna of diamars awo. “Pero pasamento di e ley aki no ta nifica cu minister president lo para su welga di hamber” e fuente di confiansa di Eman a sigura NoticiaCla. “Ta hopi cla cu e ta determina. Solamente firmando e presupuesto pa gobernador, lo para su welga di hamber. No e ley di emergencia”. Esey ta pone Eman dilanti un situacion basta fastioso pasobra esaki ta nifica cu por dura un rato mas prome cu esaki sosode.

Manera cu NoticiaCla a raporta caba, dialuna, mas tarda diamars, e secretariado di College Financieel Toezicht lo cuminsa nan investigacion riba e presupuesto. Y nan tin por lo menos dos pa tres siman di tempo pa haci esaki. Despues di esey, si tur cos mustra bon, e ora gobernador lo por pone su firma. No ta conoci si Eman lo kier sigui cu e welga di hamber pero por lo menos e lo purba. Mientras cu e no ta hayando ningun reaccion di Hulanda su gobierno, e ta rondona pa su simpatizantenan y famia na Aruba. Un grupo relativamente grandi a dicidi cu nan tambe ta uni den e welga di hamber. Eman mes a resisti na e idea ey pidiendo e grupo pa por fabor no haci esey. “Ami ta hacie, boso no tin cu hacie” Eman a suplica na su seguidornan.

E atencion di media hulandes y den region tabata grandi. E comentarionan tabata hopi, y e reaccionnan tabata mixto. “Con ta cu boso prome minister?”, “E ta den welga di hamber ainda”, “Ta berdad cu Mike Eman a cuminsa un welga di hamber?” ta e reaccionnan cu mas por a wordo scucha. Mientras cu di su grupo, tin un simpatia grandi pa e accion aki, otronan ta haye un idea absurdo y ridiculo. “Cu un welga di hamber, bo no ta logra nada”, “E pueblo ta sufriendo masha tempo, no awo so”, “Eman ta pretende di ta Ghandi, no por” ta e comentarionan negativo cu por a tende. E hecho ta cu e ta hayando atencion. Solamente no di esnan cu e mester haya, esta gobierno hulandes. Por lo menos no ainda. Esnan rond di Eman, ta optimista cu esey lo cambia ora cu siman habri, ya cu nan tin siguransa di varios canal, cu ta trahando duro dia y anochi, pa establece un liña di contacto entre Aruba y Hulanda. Un liña cu ta duro sera aworaki. E foto ta ilustra Mike Eman riba su prome dia di welga di hamber, cu su casa Doina Eman Neagoy. Foto Garrick Lacle/NoticiaCla.