Sharin Luydens ta presidi hunta di supervision di Universidad di Aruba

ORANJESTAD – E actual hefe di Censo di Aruba mr Sharin Luydens a keda nombra como presidente di hunta di supervision di Universidad di Aruba. Na Hulandes esaki yama ‘President van het College van Curatoren’, cu por wordo compara cu un ‘Board of Trustees’. E ta e directiva di Universidad di Aruba cu ta maneha y supervisa e Universidad. Luydens a confirma su nombracion pa NoticiaCla.com.  “ Mi lo haci mi best pa duna un bijdrage positivo” Luydens a bisa e portal aki. Banda di Luydens, a nombra e siguiente personanan pa forma parti di e directiva. Ta trata di Henry Koolman ( director CBS), Angelo Brete (Director MOT), Haime Croes (director DIP). Segun Luydens, “educacion di un pueblo ta E fundeshi solido pa un sociedad culto y integro. Unico inversion cu ta paga e mihor interesnan pa cu su nacion” y ta esaki ta su meta pa cu e labor nobo cu e ta bay eherce tambe, banda di su funccion regular di hefe di Censo. Luydens tin un carera basta impresionante, cu el a cuminsa como agente policial, sigui despues pa studia ley na e propio Universidad di Aruba, cu awor e ta bay supervise, y ta conoci pa algun aña caba como e hefe di Censo, unda cu bou di su liderazgo a conoce cambionan hopi positivo. Ademas e ta fungi como secretario di conseho supremo electoral durante periodo di eleccion. 

Algun tempo caba tabatin problema riba e tema, ora cu e directiva anterior a retira en bloc den forma di protesta pa supuesto metemento di minister di Enseñansa, cu lo kier a impone cierto cambionan. E colegio e momento ey no a gusta e actitud aki y a opta pa retira. Pero esey no por a sosode sin mas, y a tarda pa haya reemplasantenan pa e funcionan necesario. Cu e directiva nobo aki, ta trece un cambio y ta uno cu tur hende por biba cu ne. Un grupo di hende capaz y responsabel.