Plasterk: Gobernador Refunjol a demostra cu e tin weso di lomba

WILLEMSTAD/ORANJESTAD – Caminda ta necesario, gobernadornan mester para politiconan. Expresion di minister hulandes encarga cu Reino, Ronald Plasterk a bisa e siman aki durante su bishita na Corsou. Tambe e mandatario ta bisa cu gobernador Freddis Refunjol tin weso di lomba. Den un combersacion cu e matutino Extra, e mandatario a reacciona riba e situacion e.o. cu tin na Aruba, unda cu tabatin critica riba e forma con gobierno a actual. E mandatario hulandes na e occasion aki no a bishita Aruba, sino solamente Bonaire y Corsou. Esaki no tin di haber cu ‘e no kier topa premier Eman’, e mandatario hulandes a bisa. Riba tema di gobernador Plasterk a bisa cu e gobernador ta capas e integro. Algo cu tur otro gobernador di Reino tin tambe segun e mandatario.

Gobernadornan no ta hende cu politica por bisa nan kico nan tin cu haci, Plasterk a sigui bisa. E mandatario a mustra tambe cu Hulanda no ta di acuerdo pa elimina e rol di un gobernador completamente manera cu Corsou a purba recientemente pa medio di un mocion. “Esey no por tampoco, como cu e puesto ta basa riba un leu di Reino pa cua mester di bendicion di tur partner” Plasterk a bisa. “Y nos ta kere cu e situacion manera cu e ta aworaki, ta maha bon” Plasterk a sigui bisa.

Riba e asunto di aanwijzing cu gobierno di Reino a duna gobernador algun luna pasa, relaciona cu e presupuesto 2014, Plasterk a mustra cu ‘e investigacion cu a haci di e presupuesto tabata un sorpresa hopi desagradabel, aunke tabatin indicacion cu cosnan no tabata bayendo bon’. Pa loke ta e declaracion riba weso di lomba, fuera di Refunjol, Plasterk ta bisa cu tur e otro gobernadornan tin esaki tambe. “Caminda ta necesario, nan mester para politiconan” Plasterk a bisa.