Fazio: Pakico ainda no tin un local na cabez di aeropuerto

ORANJESTAD – Cu baymento di e director (CEO) actual di aeropuerto di Aruba James Fazio fin di e luna aki, a bin e pregunta atrobe pakico no por a nombra un persona local, manera cu a priminti den pasado. Pa e situacion actual, den opinion personal di Fazio, ta miho pa aeropuerto di Aruba tin un director na cabez cu tin experiencia cu construccion. Asina director saliente James Fazio a bisa den e programa NoticiaCla LIVE recientemente. Pero mes momento e ta bisa cu un local lo por ta na cabez di e aeropuerto, pero cu esey ta un decision cu gobierno di Aruba tin cu tuma. “Esey no ta un decision di Schiphol pa tuma”.

CONSTRUCION

E realidad sinembargo ta cu a inicia un periodo di construccion magno na e aeropeurto y un hende cu experiencia di esaki, lo ta e miho persona aworaki pa maneha e proyecto aki. Y mientras cu e no ta desacredita ningun di e miembronan local den e management team, por compronde cu aworaki lo no tin un local cu e experiencia necesario ey. Por lo menos no di e magnitude ey. 

LOCAL NA CABEZ POR

A crea un impression den pasado, cu mientras cu Royal Schiphol Group ta na cabez di aeropuerto, su tarea tabata pa provee un persona experencia pa haci e trabou, cu ta prepara un personal local cu eventualmente lo mester tuma over. Fazio a splica cu no necesariamente esaki ta e asunto. Segun Fazio, durante su tempo na Aruba, y loke Royal Schiphol Group a haci, ta crea un ambiente y expone na e management team local, cu a duna nan e oportunidad pa nan prepara nan mes (pa ta cla pa e funcion). E pregunta cu si un persona local por tuma e posicion di un CEO di aeropuerto di Aruba awe, e contesta ta si. “E aeropuerto lo no stop di funciona, cu un local na cabez. Pero ta un decision cu gobierno di Aruba tin cu tuma”, Fazio a bisa.  “Ami no por prepara un hende pa e siguiente paso” Fazio a bisa. E por yuda mentor nan, y duna nan mas responsabilidad, pero ta e persona mester prepara nan mes segun e director saliente. 

CANDIDATO NOBO

E anuncio di salida di Fazio, tabata uno netamente personal di dje, segun Fazio. Berdad cu tabatin rumor cu e no tabata por a funciona cu e minister encarga Dangui Oduber, pero el a desmenti e alegacion aki. Cu su anuncio, Royal Schiphol Group tabata obliga di busca un candidato pa tuma su lugar. “Esey ta e acuerdo cu tin”. Ademas, e candidato presenta pa Royal Schiphol Group, a keda acepta pa gobierno di Aruba. Mientras cu Fazio ta bisa cu pa awor, ta prefera un candidato cu experiencia di construccion, e ta hopi optimista cu na final di e proyecto, no un sino varios candidato local lo por presenta y ta cla pa tuma over como hefe di e aeropuerto.