Homber deteni na Merca ta entrenador Dominicano biba na Aruba

MERCER COUNTY/ORANJESTAD – E homber cu a keda deteni den avion recientemente, acusa di a viola un dama Mericano, na prome instante a keda identifica pa polis como un Mericano, (manera cu NoticiaCla.com a raporta di dje diaranson), a resulta di ta un Dominicano residencia na Aruba pa mas di 20 aña. Despues di e prome publicacion, prensa mericano a cambia e storia y a ‘actualisa’ esaki. Despues di mas informacion, a cuminsa raporta cu e homber ta ‘bin di Aruba’, y tabata ‘bayendo Aruba bek’ ora cu a detene den avion, acusa di a viola un dama di 20 aña. Hopi na Aruba a acerca NoticiaCla.com den shock, pasobra no por a kere e noticia. 

E CASO

Manera cu e portal aki a raporta inicialmente diaranson, e homber a keda identifica como ‘un Mericano acusa di a viola un dama hoben na Mercer County’, y cu e ta ‘tras di trali despues cu el a keda deteni mientras cu e tabata purba scapa riba un avion pa Aruba’. E homber en cuestion pues, Jesus Arias De La Cruz (35) ta acusa di violacion, asalto sexual y asalto sexual indecente. E incidente segun polis, a sosode durante un fiesta na Jefferson Township dia 20 di july ultimo. E victima di 20 aña a bisa polis cu e tabata drumi den un camber den e cas (unda cu e fiesta tabata tuma lugar), ora cu De La Cruza a drenta den e camber y a viole riba un sofa, segun raport di polis. Polis a detene e homber na e aeropeurto internacional di Pittsburg, riba e mesun dia cu e incidente a tuma lugar. E ta den prison awor y ta wordo presenta dilanti fiscal diahuebs awor. 

KEN E PERSONA TA?

E homber envolvi, Jesus Arias de La Cruz (35), segun informacion cu e portal aki a adkeri despues, ta mustra di ta un Dominicano residencia na Aruba pa mas di 20 aña, y ta un entrenador conoci, cu un character suave cu no ta conoci pa ni ‘flirt’. Un persona cu el a entrena, a acerca e portal aki y a mustra cu e persona ta uno hopi trankil di character, y ta contra tur tipo di violencia, specialmente contra di hende muhe. Pesey e noticia di su detencion a cay hopi duro pa hopi hende na Aruba. Sigur den mundo deportivo. E portal aki despues a wak varios entrevista televisa cu e persona aki, papiando di preparacion di atletanan di Aruba pa cu e deporte paralimpico. NOTA: Potret cu petchi ta cortesia 297 sports, screen shot di un entrevista.