Tur cos ta cla pa Honor to Connor Steelband Celebration #3

PALM BEACH - Tur cos ta cla pa Honor to Connor Steelband Celebration #3. Asina organizadornan a informa dialuna atardi durante e rueda di prensa di SweetPanMusic Productions pa presenta nan evento musical ‘Honor to Connor Steelband Celebration’ edicion 3. Un celebracion di nos musica, nos artistanan, den memoria di e legendario, e pionero di steelpan Sr. Edgar Connor. Na 2007 Paseo Herencia Mall a duna honor na Sr. Edgar Connor honrando e cu su nomber na e Amphitheatre, y na 2017 famia Connor a laga pone un relief na e muraya di e tribune di Amphitheatre Edgar Connor y asina a organisa un evento cu ta hiba e nomber di; ‘Honor to Connor Steelband Celebration’. E aña aki ta e di 3 aña cu ta organisa e evento aki. E team di SweetPanMusic Productions, cu ta Nico Connor, Lee Connor y Paula Engelen hunto cu Zaira Orman di Paseo Herencia y tambe Tico Kock y Ronwayne Kock di A Touch of Steel, a duna informacion di e evento y di e desaroyo di e musica di steelpan aki na Aruba.  Musica di steelpan na Aruba tin su leyenda, rumannan Connor, Nico y Lee a trese dilanti e importancia pa tin continiudad den e musica steelpan y mescos Ronwayne Kock y Tico Kock ta para tras di esaki pa educa, presenta y mantene e musica di steelpan bibo aki na Aruba. A Touch of Steel ta aprecia e oportunidad pa ta presente den e evento y lo bai duna e publico presente un bunita presentacion.  Tambe lo tey presente Quiver Quips Steel Orchestra, The Aruba Invaders Steel Orchestra 2nd y 3rd generation, N.L.G. Dancers cu lo compania Nico Connor, Wesley Connor cu lo compania su tata Lee Connor y tambe Carnaruba cu su trahenan mahestuoso. Tur aña ta reconoce personalidadnan cu ta aporta na e musica di steelpan aki na Aruba, e aña aki ta 4 persona lo wordo reconoci. Esaki ta keda un sorpresa te riba e fecha di e evento. Invitacion ta keda na henter Aruba y nos bishitantenan pa bini disfruta di un bunita anochi. Sweet Pan Music productions ta semper agradicido na e partnernan, sponsors y nos dushi hendenan cu ta kere den e bunita proyecto aki, un proyecto cu nos rumannan Connor Nico y Lee ta sigi cu ne dunando bida y continuidad di musica di steelpan. Cultura y musica nos tin di bib’e!