Plataforma di cacho cu anochi informativo pa boluntario y otronan interesa den ley di cacho

ORANJESTAD – Den cuadro di e presentacionnan y preparacion pa e ehecucion di ley di cacho na januari 2015, Plataforma Ley di Cacho ta tene un anochi di informacion pa tur esnan cu ta interesa pa haya mas informacion. Ademas, e anochi lo fungi pa recluta un cantidad di boluntario cu por participa den varios actividad relaciona cu e ehecucion di e ley aki. Durante e anochi aki, lo haya tur informacion detaya di kico tur e boluntarionan por haci y con y kico nan tin cu haci pa esey tuma lugar. E evento ta uno gratuito y ta tuma lugar diahuebs awor pa 6:30pm den Amsterdam Ballroom na Marriott Hotel (e ultimo edificio di Marriott). E evento lo dura 2 ora y lo ta yena cu informacion balioso pa tanto esnan cu djis kier informacion y tambe registra pa bira boluntario. 

E plataforma a lanta algun luna pasa y ta consisti di varios profesional na Aruba riba tereno di cacho. Durante e ultimo lunanan nan a prepara un plan di ehecucion, cu ta inclui un campaña di concientisacion y tambe un plan di ehecucion unabes cu aña bolter. Durante diahuebs anochi, lo splica mas di e plataforma mes y kico tur a haci te cu e momento aki. Un y tur ta wordo invita pa ta presente pues, diahuebs anochi 6:30pm na Amsterdam Room na Marriott Hotel. Bin forma parti di un proyecto bunita, cu tin como fin, soluciona e problema di cacho di caya na Aruba. Un problema cu ta afecta tur hende.