Reina Beatrix School ta reanuda scol dialuna awor na dos diferente localidad

ORANJESTAD - Reina Beatrix School ta reanuda scol dialuna awor despues di tabata sera un siman. Mientrastanto a reuni cu e cabesante, docentenan, DPS, Directie Onderwijs, DOW y tambe bureau di minister di enseñansa Hooyboer pa asina aki hunto pone e diferente opcion nan cu tin pa por aloca e scol mas lihe posibel mirando cu aki ta traha di un scol bastante grandi cu ta consisti di 12 klas. Teniendo esaki na cuenta a opta pa split e scol y a manda nan YMCA Dakota caminda lo aloca klas 1 y 2 ya cu akinan tin mas espacio pa nan por hunga pafo. Y klas 3 tot 6 ta wordo aloca na DOC Opleiding caminda antes Mon Plaisir Basis tabata aloca.

Minister Michelle Hooyboer - Winklaar a laga cera Reina Beatrix School despues cu e docentenan a entregue un carta caminda nan a menciona varios punto di preocupacion cu nan tin pa nan mes y tambe pa tur studiante di e scol. Esaki tabata concerni nan salud y nan siguridad. A manda e team analisa e gravedad di e situacion y despues di e bishita a dicidi mesora pa laga cera e scol. No tabata un decision facil pa tuma, teniendo diferente aspecto na cuenta. Segun e mandatario, cera e scol ta nifica un retraso den e enseñansa di nos muchanan pero nan siguridad y nan salud ta bin na prome luga.

E tardansa pa no a habri e scol e siman aki ainda tabata cu mester a haci algun cambio na e structura actual di e edificio pa por aloca e klas nan mas miho posibel.E bon noticia ta cu pa dialuna entrante, 24 November tur klas di Reina Beatrix lo ta cla pa start na nan localidad nobo. DOW hunto cu Infra Team, Directie Onderwijs y bureau di minister lo ta encarga cu e edificio bieu di Reina Beatrix pa asina haci e renobacionnan necesario pa por move nan bek mas lihe posibel.