Simar ta lamenta decision unilateral di minister Lampe

ORANJESTAD - Sindicato di Maestro ta lamenta decision unilateral di minister Lampe. Esey tabata e prome reaccion di presidente di sindicato di maestro esta Josephine Albertus pa NoticiaCla.com.“ Simar atraves di su miembrecia tambe a tuma nota di e carta di Minister di Enseñansa fecha 24 di juli, dirigi na directivanan di scol”, Albertus a cuminsa na bisa. “ Simar ta lamenta cu apesar di ta sinti riba un base regular cu Minister di Enseñansa pa evita conflicto laboral y precupacion inecesario bou di maestronan, toch ta wordo confronta cu desicionan unilateral asina. Simar lo aserca e minister encuestion pa pidi alcaracion y despues lo informa su miembrecia riba e pasonan cu lo mester tuma” e presidente a finalisa bisando. 

E SITUACION

Manera NoticiaCla.com a raporta diabierna caba, un medida cu ta drenta na vigor ‘per direct’, den enseñansa ta cu gobierno no ta paga overtime mas na docentenan y nan asistente. Den un carta fecha 24 di juli 2019 cu ta den poder di NoticiaCla.com, e mandatario di enseñansa Rudy Lampe ta anuncia algun medida cu por trece problema den seno di enseñansa y crea un impasse pa ora cu scol habri aki dos siman. Esaki pasobra e regla nobo ta viola e  palabracion haci na comienso di vacantie di gobierno na docentenan cu a protesta algun siman atras, cu lo no haci ningun cambio durante vacantie grandi riba tereno di enseñansa. 

E CARTA

E carta aki, cu ta inclui un cantidad di medida fuera di e paro inmediato di overtime, ta bisa tambe cu e asina yama pago pa vacantie no usa debi na malesa (AO), ta wordo para tambe ‘per direct’. 

MOTIBO CAFT

Gobierno (lesa: minister Rudy Lampe) ta ‘culpa’ gobierno di Reino Hulandes y e colegio di supervision financiero di Aruba (CAFt). E carta su prome frase ta cuminsa na bisa cu ta gobierno di Reino Hulandes y e colegio di supervision financiero a confronta gobierno di Aruba ‘atrobe’ cu e ‘realidad di e disciplina di presupuesto’.  Como tal, e mandatario responsabel pa enseñansa a dicidi cu tin cu ‘optimalisa’ e maneho di subsidio. Segun e mandatario, esaki no por sosode sin sosten di e directivanan di scol, DPS, Directie Onderwijs y Dienst Inspectie Onderwijs. 

MANEHO DI SUBSIDIO

E intencion ta pa ancra e maneho nobo di subsidio den un buki di maneho. Pero anticipando esaki, y mirando e limitacion presupuestario, Lampe ta bisa cu ta necesario y urgente pa implementa e medidanan mesora pa por maneha e subsidio di personal y gastonan di personal. Cu bista riba esey, ta introduci tres regla mesora, esta per direct, den cual ta figura esun di paro di tur pago di overtime. 

REGLANAN

E prome regla implementa, ta bisa cu e cantidad di docentenan full time cu ta wordo subsidia, ta a base di un klas di 28 alumno, den base regular, y pa scol secundario, klasnandi 24 alumno. E siguiente regla ta toca e asina yama taak uren osea funcionan extra cu e docentenan tin cu eherce, ta wordo limita na maximo 1/8 parti di e total pa docente. Ademas tin e paro di overtime, pa tanto docente como esnan cu ta asisti e docente. “Overtime no ta wordo presupuesta, y como tal ta wordo mira como cosnan cu ta ‘surpasa’ e presupuesto di pais Aruba. Y como tal, esaki no ta wordo permiti.